فرح گوگی پر 12 ارب کی ٹرانزیکشن ثابت ہوچکی، رانا ثناء اللّٰہ
وفاقی وزیر داخلہ رانا ثناءاللّٰہ نے کہا ہے کہ عمران خان نے اپنے 4 سالہ دور میں کوئی ترقیاتی منصوبہ نہیں دیا۔ فرح گوگی پر 12 ارب کی ٹرانزیکشن ثابت ہوچکی۔
فیصل آباد میں خطاب کے دوران رانا ثناءاللّٰہ نے کہا کہ عمران خان نے عالمی مالیاتی ادارے سے سخت شرائط پر معاہدہ کیا، آئی ایم ایف کے ساتھ اس کی آڈیو بھی سامنے آچکی ہے۔
انہوں نے کہا کہ عمران خان کے دور میں فرح گوگی کو کھلی چھوٹ دی گئی، اُس خاتون پر 12 ارب روپے کی ٹرانزیکشن ثابت ہوچکی ہے۔
وفاقی وزیر داخلہ نے مزید کہا کہ عمران خان نے اپنے 4 سالہ دور میں کوئی ترقیاتی منصوبہ نہیں دیا اور ملنے والے تحفے بھی بازار میں بیچ دیے۔
ان کا کہنا تھا کہ عمران نیازی نے جعلی رسید بنا کر توشہ خانہ سے تحائف اٹھائے، پی ٹی آئی چیئرمین نے قوم کا ناقابل تلافی نقصان پہنچایا۔
رانا ثناءاللّٰہ نے یہ بھی کہا کہ ماضی میں غلطیاں ہوئیں جس پر ایک نااہل کو مسلط کیا گیا۔ عمران خان جھوٹا اور نااہل شخص ہے اگر قوم نے دوبارہ دھوکا کھایا تو اس کی سزا بھگتنا پڑے گی۔
ان کا کہنا تھا کہ عمران خان نے دوسروں پر الزام لگانے کے سوا کچھ نہیں کیا، پی ٹی آئی چیئرمین کے دور میں غلط فیصلوں کی وجہ سے ملک میں مہنگائی ہے۔
انہوں نے کہا کہ مسلم لیگ (ن) اور میاں نواز شریف 3 مرتبہ اس ملک میں آزمائے گئے، نواز شریف دور میں ملک میں لوڈشیڈنگ کا خاتمہ ہوا۔
وفاقی وزیر داخلہ نے کہا کہ عمران خان نے دوسروں پر الزام لگانے کے سوا کچھ نہیں کیا، جس ملک میں سیاسی استحکام نہ ہو وہ کبھی ترقی نہیں کرتا۔
Comments are closed.