غزہ میں عارضی جنگ بندی کے پہلے دن کیا صورتِ حال ہے؟

غزہ میں اسرائیل اور حماس کے درمیان 4 روزہ عارضی جنگ بندی کے آغاز کے بعد مصر سے براستہ رفح کراسنگ 8 ٹینکر جنوبی غزہ میں داخل ہو گئے۔

اسرائیلی فوج کے مطابق 4 ٹینکر ایندھن اور 4 ٹینکر کوکنگ گیس کے داخل ہوئے، ٹینکرز اقوامِ متحدہ کی امدادی تنظیموں کو منتقل کر دیے گئے ہیں۔

عرب میڈیا کے مطابق آج کم از کم 200 امدادی ٹرک غزہ میں داخل ہونے کی توقع ہے۔

غزہ میں اسرائیل اور حماس کے درمیان 4 روزہ عارضی جنگ بندی کا آغاز ہوگیا۔

دوسری جانب فلسطینی اہلکار کا کہنا ہے کہ معاہدے کے تحت اسرائیل آج مغربی کنارے میں 39 فلسطینی قیدیوں کو رہا کرے گا۔

فلسطینی اہلکار کے مطابق فلسطینی قیدیوں میں 24 خواتین اور 15 نوجوان شامل ہیں۔

غیر ملکی میڈیا کے مطابق حماس کی جانب سے 13 اسرائیلی یرغمالیوں کی رہائی عمل میں آئے گی۔

واضح رہے کہ 7 اکتوبر سے جاری رہنے والی اسرائیلی جارحیت میں شہداء کی مجموعی تعداد 14 ہزار 854 ہو گئی ہے جس میں 6 ہزار 150 بچے اور 4 ہزار خواتین شامل ہیں۔

بشکریہ جنگ