عمران خان کے خلاف مقدمے کے بعد گرفتاری کا امکان

چیئرمین پاکستان تحریک انصاف (پی ٹی آئی) عمران خان کو گرفتار کیا جاسکتا ہے۔

جیو نیوز کے اینکر شہزاد اقبال نے بتایا کہ عمران خا ن کے خلاف انسداد دہشت گردی ایکٹ کے تحت مقدمہ دائر کیے جانے کے بعد اب اُن کی گرفتاری کا امکان ہے۔

دوسری طرف سابق وزیراعظم عمران خان کی بنی گالہ کی رہائش گاہ کے باہر پولیس کی اضافی نفری تعینات کردی گئی ہے۔

ان کا کہنا تھا کہ پی ٹی آئی کے سینئر رہنما نے بتایا کہ آئی جی اسلام آباد کے پاس عمران خان کی گرفتاری کا آرڈر ہے۔

ذرائع کے مطابق دوسری طرف وزارت داخلہ نے انسداد دہشت گردی ایکٹ کے مقدمے میں عمران خان کی گرفتاری کے لیے وزیراعظم آفس سے تحریری اجازت مانگ لی ہے۔

اس سے قبل وفاقی وزیر داخلہ رانا ثناءاللّٰہ کہہ چکے ہیں کہ حکومت عمران خان کو گرفتار کرنا چاہتی ہے۔

انہوں نے یہ بھی کہا تھا کہ عمران خان کی گرفتاری کابینہ کی اجازت کے بعد کی جائے گی، ایسا کب ہوگا، اس حوالے سے کنفرم نہیں کہہ سکتا۔

خیال رہے کہ سابق وزیراعظم عمران خان کچھ عرصے سے اپنی گرفتاری کی بات کر رہے ہیں، عمران خان اپنے قتل کی سازش کے بارے میں بھی بات کر چکے ہیں۔

بشکریہ جنگ