عمران خان لاہور ہائیکورٹ پہنچ گئے

چیئرمین تحریک انصاف (پی ٹی آئی) عمران خان لاہور ہائیکورٹ  پہنچ گئے۔

عمران خان نے عدالت عالیہ میں پیشی کے لیے روانگی سے قبل گفتگو میں کہا کہ عدالتوں کا احترام کرتا ہوں، آج لاہور ہائیکورٹ میں پیش ہو رہا ہوں۔

انہوں نے مزید کہا کہ سیکیورٹی فراہم کرنا حکومت اور اداروں کی ذمہ داری ہے۔

عمران خان نے یہ بھی کہا کہ عدالت نے جب بھی بلایا پیش ہوا، ملک میں ظلم اور ناانصافیاں ہورہی ہیں، عدالت کو اس کا بھی نوٹس لینا چاہیے۔

ان کا کہنا تھا کہ جیل بھرو تحریک سے پیچھے نہیں ہٹوں گا، ہم حق اور سچ کی آواز بلند کرتے رہیں گے۔

لاہور ہائیکورٹ کے جسٹس طارق سلیم نے عمران خان کی حفاظتی ضمانت کی درخواست اور وکالت نامے پر دستخط میں فرق کے معاملے میں چیئرمین پی ٹی آئی کی پیشی کے لیے سماعت کی۔

لاہور ہائی کورٹ نے حفاظتی ضمانت کی درخواست اور وکالت نامے پر دستخط میں فرق کی وضاحت کے لیے عمران خان کو آج 2 بجے طلب کیا تھا۔

سماعت شروع ہوئی تو جسٹس طارق سلیم شیخ نے استفسار کیا کہ 2 بجےکا وقت تھا، کہاں ہیں عمران خان؟ عمران خان کے وکلا نے بتایا کہ وہ راستے میں ہیں، کچھ دیر میں پہنچ جائیں گے، سکیورٹی کا مسئلہ ہے۔

جسٹس طارق سلیم شیخ نےکہا کہ سکیورٹی کا مسئلہ میں نے حل نہیں کرنا، سماعت کچھ دیر کے لیے ملتوی کر رہے ہیں، عدالت میں رش بھی کم کریں۔

وقفے کے بعد سماعت دوبارہ شروع ہوئی تو عمران خان کے وکیل کا کہنا تھا کہ عمران خان کی حفاظتی ضمانت کی درخواست ان کے دستخط سے فائل نہیں ہوئی تھی۔

لاہور: عدالت نے عمران خان کو پیش ہونے کے لیے 5 بجے کا وقت دیا تھا

لاہور: عمران خان تاحال ہائیکورٹ میں پیش ہونے کے لیے نہیں پہنچے

لاہور:عمران خان ہائیکورٹ میں پیش ہونے کے لیے آرہے ہیں، وکلا

لاہور: حفاظتی ضمانت کی درخواست میں عمران خان کےمختلف دستخط کےمعاملےمیں طلبی

لاہور: جسٹس سلیم شیخ کی عدالت نےعمران خان کو 5 بجےپیش ہونےکاکہاتھا

لاہور:عمران خان حفاظتی ضمانت کے لیے ہائیکورٹ میں پیش ہوں گے

لاہور:عمران خان کا قافلہ جی پی او چوک پہنچ گیا

بشکریہ جنگ