عطا تارڑ کیخلاف مقدمہ کس نےدرج کروایا؟
خانیوال کے صوبائی حلقہ پی پی 206 میں 16 دسمبر کو ہونے والے ضمنی انتخاب سے قبل پاکستان پیپلز پارٹی کے امیدوار نے مسلم لیگ نون کے رہنما عطا تارڑ کے خلاف حملہ کروانے اور دھمکیاں دینے کا مقدمہ درج کروا دیا ۔
خانیوال کے سٹی پولیس اسٹیشن میں پاکستان پیپلز پارٹی کے پی پی 206 خانیوال سے امیدوار سید واثق جرجیس حیدر نے پاکستان مسلم لیگ نون کے رہنما عطا تارڑ سمیت 12 نامزد افراد کے خلاف مقدمہ درج کروا دیا ۔
سید واثق جرجیس حیدر نے الزام عائد کیا کہ عطا تارڑ نے ان کے چک شہانہ میں واقع گھر میں قائم الیکشن آفس پر حملہ کروایا۔
انہوں نے ایف آئی آر میں مزید کہاکہ مسلح حملہ آور الیکشن آفس کا گیٹ توڑ کر اندر داخل ہوئے، الیکشن آفس میں موجود پولنگ ایجنٹس پر ڈنڈے برسائے ، پولنگ ایجنٹ خواتین کو بالوں سے پکڑ کر گھسیٹا اور فوری الیکشن آفس کو بند کرنے کا کہا اور قتل کرنے کی دھمکیاں دیں۔
پیپلز پارٹی رہنما نے عطا تارڑ سمیت نامزد ملزمان کے خلاف کارروائی کی درخواست کی ہے۔
واضح رہے کہ ضمنی الیکشن سے قبل حلقے میں دلچسپ صورتِ حال ہے جس کے سبب یہ الیکشن خصوصی اہمیت حاصل کر گیا ہے۔
یہ نشست نون لیگی ایم پی اے نشاط خان ڈاھا کے انتقال کے باعث خالی ہوئی تھی۔
اس حلقے سے 2018ء کے الیکشن کے پی ٹی آئی امید وار رانا محمد سلیم حالیہ ضمنی الیکشن میں نون لیگی امید وار ہیں جبکہ2018ء میں نون لیگ کے امید وار نشاط احمد ڈاھا کی بیوہ نورین نشاط ڈاھا حالیہ ضمنی الیکشن میں پی ٹی آئی کی امید وار ہیں۔
Comments are closed.