عدم اعتماد: قومی اسمبلی کا اجلاس 25 مارچ کو طلب

اپوزیشن کی وزیرِ اعظم عمران خان کے خلاف تحریکِ عدم اعتماد کے حوالے سے قومی اسمبلی کے اسپیکر اسد قیصر نے اسمبلی کا اجلاس 25 مارچ کو طلب کر لیا۔

اسپیکر اسد قیصر نے قومی اسمبلی کے اجلاس کی طلبی کا نوٹیفکیشن جاری کر دیا ہے۔

جاری کیے گئے نوٹیفکیشن کے مطابق قومی اسمبلی کا اجلاس 25 مارچ بروز جمعہ صبح 11 بجے پارلیمنٹ ہاؤس میں طلب کیا گیا ہے۔

اٹارنی جنرل خالد جاوید کا کہنا ہے کہ وزیر اعظم عمران خان کے خلاف اپوزیشن کی جانب سے پیش کی گئی تحریک عدم اعتماد میں شرکت اور ووٹ دینے سے کسی رکن اسمبلی کو نہیں روکا جا سکتا

یہ اجلاس اپوزیشن کی جانب سے جمع کرائی گئی ریکوزیشن پر طلب کیا گیا ہے۔

ذرائع کا کہنا ہے کہ اجلاس میں مرحوم ارکانِ اسمبلی کی فاتحہ خوانی کی جائے گی۔

ذرائع نے بتایا ہے کہ فاتحہ خوانی کے بعد یہ اجلاس ملتوی کر دیا جائے گا۔

ذرائع نے بتایا ہے کہ قومی اسمبلی کا اجلاس او آئی سی کے وزرائے خارجہ کے اجلاس کی وجہ سے تاخیر سے 25 مارچ کو طلب کیا گیا ہے۔

پاکستان پیپلز پارٹی کی رہنما شیری رحمٰن کا کہنا ہے کہ آئین کے مطابق ریکوزیشن کے بعد اسپیکر 14 دن کے اندر اجلاس بلانے کے پابند ہیں، گنتی کے حساب سے 14 دن کل(پیر 21 مارچ کو) پورے ہو رہے ہیں۔

’’کل اجلاس نہ بلانا آئین شکنی ہے‘‘

انہوں نے کہا کہ آئین کے مطابق قومی اسمبلی کا اجلاس کل (پیر 21 مارچ کو) طلب کیا جانا چاہیے۔

حکمراں جماعت پاکستان تحریکِ انصاف (پی ٹی آئی) کے جہانگیر ترین گروپ نے ایک بار پھر وزیرِ اعلیٰ پنجاب عثمان بزدار کی تبدیلی کا مطالبہ کر دیا۔

پاکستان پیپلز پارٹی کی رہنما نے کہا کہ اگر کل قومی اسمبلی کا یہ اجلاس نہیں بلایا جاتا تو یہ آئین شکنی ہو گی۔

شیری رحمٰن نے یہ بھی کہا کہ او آئی سی کی آڑ میں آئین شکنی نہیں کی جا سکتی۔

بشکریہ جنگ