عدالتی معاونین کی رائے کو ہی اپنانا چاہوں گا، وکیل پی ٹی آئی

پاکستان تحریک انصاف  (پی ٹی آئی) کے وکیل فیصل چوہدری نے کہا ہےکہ وہ آج کی سماعت میں عدالتی معاونین کی رائے کو ہی اپنانا چاہیں گے، لیکن اب عدالت نے فرد جرم کا فیصلہ سنا دیا ہے تو عمران خان کے پاس بھی اس کے بعد کے آپشن ہوں گے۔

اسلام آباد ہائیکورٹ کے باہر میڈیا سے گفتگو کرتے ہوئے پی ٹی آئی کے وکیل فیصل چوہدری نے کہا کہ عدالت غیر مشروط معافی کی توقع کر رہی تھی۔

سابق اٹارنی جنرل نے مزید کہا کہ اب وہ پرانا قانون ہے تو اس کے مطابق ہی عدالت کے لیے ان کو چھوڑنا کافی مشکل ہوگا۔

 فیصل چوہدری نے کہا کہ طلال چوہدری اور دیگر کے کیسز میں کریمنل کنٹیمپٹ نہیں تھی۔

انہوں نے کہا کہ دو سینئر قانون دانوں نے جو دلائل دیے ان کی رائے سے متفق ہوں، فرد جرم عائد کرنا پانچ ججز کا فیصلہ ہے، قانونی آپشنز تو عمران خان کے پاس ہیں، ان آپشنز سے متعلق ان کی لیگل ٹیم بہتر سمجھ سکتی ہے۔

عمران خان کے خلاف توہین عدالت کیس میں اسلام آباد ہائی کورٹ کے لارجر بینچ نے تحریری حکم نامہ جاری کیا۔

تحریری حکم نامے میں کہا گیا ہے کہ فریقین کے وکلا، اٹارنی جنرل اور عدالتی معاونین کو سنا گیا، عمران خان کا جواب تسلی بخش نہیں۔

حکم نامے میں کہا گیا کہ عمران خان پر 22 ستمبر کو فرد جرم عائد کی جائے گی۔

تحریری حکم نامہ 2 صفحات پر مشتمل ہے، جسے 5 رکنی لارجر بینچ نے جاری کیا۔

تحریری حکم نامہ کے مطابق 22 ستمبر کو دن ڈھائی بجے کیس کی سماعت ہوگی۔

چیف جسٹس اسلام آباد ہائی کورٹ اطہر من اللّٰہ کی سربراہی میں 5 رکنی لارجر بینچ نے کیس کی سماعت کی۔ بینچ میں جسٹس محسن اختر کیانی، جسٹس میاں گل حسن اورنگزیب، جسٹس طارق محمود جہانگیری اور جسٹس بابر ستار شامل ہیں۔

واضح رہے کہ سابق وزیر اعظم عمران خان کے خلاف 20 اگست کو مجسٹریٹ علی جاوید کی مدعیت میں تھانہ مارگلہ میں انسداد دہشت گردی ایکٹ کے تحت مقدمہ درج کیا گیا تھا۔

ایف آئی آر میں کہا گیا تھا کہ 20 اگست کو پی ٹی آئی رہنما شہباز گل کی گرفتاری کے خلاف عمران خان کی قیادت میں ریلی نکالی گئی جس کا راستہ زیرو پوائنٹ سے ایف 9 پارک تک تھا، اس دوران عمران خان کی تقریر شروع ہوئی جس میں انہوں نے اسلام آباد پولیس کے اعلیٰ ترین افسران اور ایک معزز خاتون ایڈیشنل جج صاحبہ کو ڈرانا اور دھمکانا شروع کیا۔

ریلی سے خطاب میں عمران خان نے اسلام آباد پولیس کے آئی جی اور ڈی آئی جی کے خلاف مقدمہ درج کرنے کی دھمکی دیتے ہوئے کہا تھا کہ ’ہم تمہیں چھوڑیں گے نہیں‘۔

اس کے بعد عمران خان نے عدلیہ کو اپنی جماعت کی طرف متعصب رویہ رکھنے پر بھی خبردار کرتے ہوئے کہا تھا کہ اب وہ بھی نتائج کے لیے تیار ہو جائیں۔

بشکریہ جنگ