عثمان بزدار کے سیاست چھوڑنے پر منظور وسان کا ردعمل

وزیراعلیٰ سندھ کے مشیرِ زراعت منظور وسان نے کہا ہے کہ سیاست سے تو کافی لوگ دستبردار ہو رہے ہیں لیکن مجھے عثمان بزدار کی سیاست چھوڑنے پر دکھ ہوا۔ 

 سابق وزیراعلیٰ پنجاب اور پی ٹی آئی کے رہنما عثمان بزدار کی جانب سے  سیاست چھوڑنے کے اعلان پر ردعمل میں منظور وسان کا کہنا تھا کہ دکھ تو یہ ہے کہ بزدار نے تو کبھی سیاست کی ہی نہیں تو علیحدگی کس سے اختیار کی۔

سابق وزیرِ اعلیٰ پنجاب سردار عثمان بزدار نے سیاست سے دستبردار ہونے کا اعلان کر دیا۔

انہوں نے مزید کہا کہ ہوتا یوں کہ سیاست بزدار کو چھوڑتی لیکن یہاں تو بزدار نے سیاست چھوڑ دی۔ سیاست سے بزدار کو تو نقصان نہیں ہوا البتہ سیاست کو بزدار سے نقصان ضرور ہوا۔ 

منظور وسان نے کہا کہ عثمان بزدار تو روحانی طریقے سے پنجاب کے وزیراعلیٰ بنے اور سیاسی طریقے سے فارغ ہو گئے۔ 

انہوں نے کہا کہ جس نے بزدار کو وزارت اعلیٰ سے ہٹایا آج وہ اینٹی کرپشن میں اندر اور بزدار باہر ہے۔ بزدار نے سیاست چھوڑ دی پارٹی نہیں کیونکہ وہ پی ٹی آئی میں کبھی تھا ہی نہیں۔

بشکریہ جنگ