صارف کو فوڈ ڈیلیوری ایپ پر درست پتہ نہ بتانے پر خوشی کیوں ہوئی؟

کھانا آرڈر کرنے کے لیے فوڈ ڈیلوری ایپ استعمال کرنے والے ایک صارف کو اس وقت بے حد خوشی ہوئی جب اسے ایک جذباتی پیغام موصول ہوا۔

شاہ ڈیوس نامی ایک صارف نے فیس بک پر ایک پوسٹ شیئر کی ہے جوکہ سوشل میڈیا پر وائرل ہوگئی ہے۔

اس پوسٹ کے مطابق، صارف نے فوڈ ڈیلیوری ایپ سے کھانا آرڈر کیا تھا لیکن اسے اس بات کا اندازہ بعد میں ہوا کہ وہ ایپ پر اپنا پرانا پتہ نئے سے تبدیل کرنا بھول گیا۔

صارف کا کہنا تھا کہ پہلے تو اسے اپنا پتہ تبدیل کرنا بھول جانے پر افسوس ہوا لیکن جب اس نے اپنا کھانا ڈیلیوری رائیڈر کو دے دیا اور جواب میں رائیڈر کا ایک جذباتی پیغام موصول ہوا تو اسے ایپ پر اپنا ایڈریس تبدیل کرنا بھول جانے پرخوشی ہوئی۔

صارف نے فوڈ ڈیلیور کرنے والے رائیڈر سے ہونے والی اپنی چیٹ کا اسکرین شاٹ بھی شیئر کیا ہے۔

اس چیٹ میں صارف نے فوڈ ڈیلیور کرنے والے رائیڈرکو وضاحت دی کہ وہ ایپ پر اپنا پتہ تبدیل کرنا بھول گیا ہےاور ابھی وہ میری لینڈ میں رہتا ہے، اس لیے یہ کھانا آپ رکھ لیں۔

جس پر رائیڈر نے صارف کا شکریہ ادا کیا اور اس کے بعد ایک اور میسج کیا  جس میں لکھا تھا کہ ’ آج میرے بھائی کی سالگرہ ہے اور اس کی قبر اس جگہ سے کافی قریب ہے، آج میں آپ کی وجہ سے اس کے ساتھ کھانا کھا سکوں گا‘

صارف کی اس پوسٹ پر سوشل میڈیا صارفین کی جانب سے بہت تعریفیں کی جارہی ہیں۔

بشکریہ جنگ