شہزادہ ہیری کی کتاب نے بارک اوباما کی کتاب کو پیچھے چھوڑ دیا

برطانوی شہزادہ ہیری کی کتاب اسپیئر (Spare) نے سابق امریکی صدر بارک اوباما کی کتاب کو پیچھے چھوڑ کر نیا ریکارڈ بنا لیا۔

غیر ملکی میڈیا کے مطابق شائع ہونے کے پہلے ہی دن برطانوی شہزادہ ہیری کی کتاب اسپیئر کی برطانیہ، کینیڈا اور امریکا میں 14 لاکھ 3 ہزار کاپیز فروخت ہوئیں جس کے بعد یہ اب تک کی سب سے تیزی سے فروخت ہونے والی غیر افسانوی کتاب بن گئی ہے۔

گنیز ورلڈ ریکارڈز کے مطابق اس سے قبل یہ ریکارڈ امریکا کے سابق صدر بارک اوباما کی کتاب آ پرومسڈ لینڈ (A Promised Land) کو حاصل تھا جو 2020ء میں شائع ہوئی تھی اور پہلے ہی دن اس کتاب کی 8 لاکھ 87 ہزار کاپیاں فروخت ہوئی تھیں۔

رپورٹس کے مطابق شہزادہ ہیری کی کتاب کے کچھ اقتباسات شائع ہونے سے پہلے منظرِ عام پر آ گئے تھے تاہم پھر بھی کتاب کی ریکارڈ فروخت پر حیرانی کا اظہار کیا جارہا ہے۔

برطانوی شہزادہ ہیری نے کہا ہے کہ والد اور بھائی سے تعلقات کے حوالے سے میرے پاس ایک اور کتاب لکھنے کا مواد بھی موجود ہ

واضح رہے کہ برطانوی شہزادے ہیری کی کتاب، اسپیئر (Spare) منگل کو شائع ہوئی تھی جس میں انہوں نے شاہی خاندان، اپنے والد اور بھائی سے متعلق کئی انکشافات کیے ہیں۔

یاد رہے کہ شہزادہ ہیری 2020ء میں شاہی اعزازات چھوڑ کر اہلیہ میگھن مارکل کے ہمراہ امریکا چلے گئے تھے۔

بشکریہ جنگ