شہباز گِل کی اسپتال سے ایک اور ویڈیو سامنے آگئی

اسلام آباد پولیس کے زیرِ حراست رہنما پاکستان تحریکِ انصاف شہباز گِل کی اسپتال  سے ایک اور ویڈیو سامنے آئی ہے۔

شہباز گِل کی بھوک ہڑتال ختم کروانے میں ڈاکٹرز اور پولیس حکام کامیاب ہو گئے، نئی ویڈیو میں شہباز گِل کو جوس اور فروٹ کھاتے ہوئے دیکھا جا سکتا ہے۔

ویڈیو میں شہباز گِل اسپتال کے عملے سے جوس مکمل نہ کرنے اور فروٹ نہ کھانے پرضد کر رہے ہیں۔

عدالتی فیصلے میں کہا گیا کہ جسمانی ریمانڈ کے دوران پولیس ٹارچر نہیں کرسکتی، عدالت نے دو روزہ میڈیکل کیلئے ملزم کو پمز اسپتال بھیجنے کا فیصلہ کیا، پیر کو ملزم اور میڈیکل رپورٹس عدالت میں پیش کی جائیں، پولیس کے مزید جسمانی ریمانڈ کی استدعا کو معطل کیاجاتا ہے۔

تقریباً 3 منٹ کی ویڈیو میں شہباز گِل مسلسل بول رہے ہیں، اس دوران اُن کی  نہ سانس پھول رہی ہے اور نہ ہی کھانسی آ رہی ہے۔

دوسری جانب اسپتال ذرائع کا بتانا ہے کہ شہباز گِل مکمل طور پر صحت مند  اور اُن کی تمام رپورٹس تسلی بخش ہیں۔

واضح رہے کہ شہباز گل کے خلاف بغاوت پر اکسانے کے کیس کی سماعت اسلام آباد کی مقامی عدالت میں آج پھر ہوگی، عدالت نے آج شہباز گل کی نئی میڈیکل رپورٹ طلب کر رکھی ہے۔

بشکریہ جنگ