شہباز گِل پر ایسا تشدد ہوا جو بتایا اور دکھایا نہیں جا سکتا، بابر اعوان

پی ٹی آئی رہنما بابر اعوان کا کہنا ہے کہ شہباز گِل پر ایسا تشدد ہوا جو نہ بتایا جا سکتا اور نہ دکھایا جا سکتا ہے، میڈیا کے لوگ بھی چیخ چیخ کر کہہ رہے ہیں کہ تشدد ہوا ہے۔

بابر اعوان نے میڈیا سے بات چیت کرتے ہوئے کہا کہ آئی جی نے تفتیش کرنے کے لیے ایک اشتہار جاری کیا ہے جس میں کہا گیا کہ جس کسی کو شہباز گِل پرتشدد کا پتہ ہے وہ آکر بتائے۔

پی ٹی آئی رہنما نے کہا کہ پاکستان کے چاروں صوبوں سے انڈی پینڈنٹ ڈاکٹرز پر مشتمل بورڈ بنایا جائے، انڈی پینڈنٹ ڈاکٹرز پر مشتمل بورڈ کا خرچہ ہم برداشت کریں گے۔

بغاوت پر اکسانے کے الزام میں گرفتار پی ٹی آئی رہنما شہباز گِل کے مزید ریمانڈ پر فیصلہ محفوظ کرلیا گیا، شہباز گِل کمرہ عدالت لے جاتے ہوئے رو پڑے، کہا میرا ماسک چھین لیا گیا، خدا کا واسطہ ہے ماسک دے دیا جائے۔

انہوں نے بتایا کہ جیل کے میڈیکل افسر نے کہا کہ شہباز گِل کو بچپن سےدمہ ہے، سرکاری اسپتال اور سرکاری ڈاکٹرز پر اعتماد نہیں کیا جا سکتا، شہباز شریف کے بارے میں بھی کمر درد کی رپورٹ دی گئی تھی، نواز شریف کو پلیٹ لیٹس کا مسئلہ بتایا گیا اب وہ مزے کر رہے ہیں۔

انہوں نے کہا کہ اصل حکومت لندن سے ہو رہی ہے، عمران خان کے خلاف بیان دینے کے لیے شہباز گِل پر دباؤ ڈالا جا رہا ہے۔

بشکریہ جنگ