شہباز گل کے ایکسیڈنٹ اور بعد کی تصاویر پر سوشل میڈیا صارفین کے تبصرے

موٹر وے پر تحریک انصاف کے رہنما شہباز گل کی گاڑی کو حادثہ پیش آیا تھا جس کے نتیجے میں شہباز گل سمیت گاڑی میں سوار دیگر افراد کو معمولی نوعیت کی چوٹیں آئیں۔ 

حادثے کے بعد موٹر وے پر الٹی گاڑی اور شہباز گل کے ہاتھ میں پانی کی بوتل تھامے تصاویر سوشل میڈیا پر زیر گردش رہیں جبکہ تصاویر میں شہباز گل کو حادثے کے مقام پر صحیح حالت میں دیکھا گیا۔ تاہم جمعہ کو اسلام آباد ہائیکورٹ میں پیشی کے موقع پر شہباز گل مختلف نظر آئے۔

اس دوران ان کی گردن میں کالر اور ہاتھ پر پلاسٹر دیکھا گیا جبکہ وہ لاٹھی کے سہارے چلتے ہوئے عدالت پہنچے۔ شہباز گل کی حادثے کے روز اور ایک دن بعد کی ویڈیو پر سوشل میڈیا صارفین بھی تبصرے کیے بغیر نہ رہ سکے۔ 

آصف علی نامی صارف نے شہباز گل اور پرویز الٰہی کی تصاویر شیئر کرتے ہوئے طنزیہ انداز میں لکھا کہ ’انہیں آسکر ایوارڈ ملنا چاہیے۔‘

سلطان احمد خان نامی صارف نے شہباز گل کی گزشتہ روز پانی کی بوتل کھولتے تصویر شیئر کی جس پر کیپشن درج تھا کہ ’ایکسیڈنٹ کے بعد بازو بوتل کو زور سے کھولنے کی کوشش میں ٹوٹا، پرویز الٰہی نے شہباز گل کو اپنا پائیوڈین ڈونیٹ کرنے کا اعلان کردیا۔‘

بشکریہ جنگ