شہباز گل کی گرفتاری، ریحام خان نے پی ٹی آئی کو کیا یاد دلا دیا؟

پاکستان تحریک انصاف کے چیئرمین عمران خان کی سابقہ اہلیہ ریحام خان نے شہباز گل کی گرفتاری سے متعلق سیاسی صورتحال پر تبصرہ کرتے ہوئے پی ٹی آئی کو آڑے ہاتھوں لے لیا۔

عمران خان کے چیف آف اسٹاف شہباز گِل کو اسلام آباد پولیس کی حراست میں جسمانی ریمانڈ کے دوران طبیعت بگڑنے پر طبی معائنے کے لیے پمز اسپتال میں داخل کیا گیا ہے ۔

ایسے میں ریحام خان نے ٹوئٹر پر ایک ماضی کی ویڈیو شیئر کی ہے جس میں  مسلم لیگ (ن) کے مرحوم سینیٹر  مشاہد اللّٰہ خان سینیٹ اجلاس میں تقریر کر رہے ہیں۔

مشاہد اللّٰہ خان کا کہنا تھا کہ عمران خان کے پرانے باس پرویز مشرف کے دور میں 8 جیلیں کاٹی ہیں، آپ ہمیں ڈرا رہے ہیں،  تم ہمیں جیلوں کی دھمکیاں دیتے ہو، ڈالو جیلوں میں، لیکن مجھے آپ کے آنسو ابھی سے نظر آ رہے ہیں، جس دن آپ کو جیل میں جانا پڑا تب آپ نے رونا ہے۔

ان کا مزید کہنا تھا کہ آپ کے آنسو پونچھنے والا کوئی نہیں ہو گا بلکہ ہم میں سے ہی کوئی ہو گا۔

مشاہد اللّٰہ خان نے کہا  کہ میں، پرویز رشید اور رضا ربانی جیسے لوگ آپ کے آنسو پونچھیں گے، مار کھائے ہوئے لوگ کسی کو تکلیف نہیں دیتے، ان کا کام ہی آنسو پونچھنا ہوتا ہے۔

شہباز گل کے معائنے کیلئے میڈیکل بورڈ تشکیل دے دیا گیا، بورڈ میں 5 پروفیسرز ڈاکٹرز شامل ہیں، بورڈ میں نیورو، سرجری، کارڈیک، میڈیسن، آرتھوپیڈک کے پروفیسر ڈاکٹرز شامل ہیں۔

سابق سینیٹر کا یہ بھی کہنا تھا کہ ابھی دیکھنا تماشا کیا لگتا ہے تمہارے ساتھ، تمہیں اندازہ ہی نہیں ہے کہ اس ملک میں ہو کیا رہا ہے۔

ریحام خان نے اپنی پوسٹ میں پی ٹی آئی کو متوجہ کرتے ہوئے کہا’اب یہ سنو کیونکہ اس وقت تو  تم نے اس ’وارننگ‘ کو نظر انداز کردیا تھا‘۔

بشکریہ جنگ