شہباز شریف ضمانت کیس میں 3 رکنی بینچ تشکیل

چیف جسٹس لاہور ہائیکورٹ نے شہباز شریف کی آمدن سے زائد اثاثوں کے ریفرنس میں ضمانت کے معاملے پر جسٹس علی باقر نجفی کی سربراہی میں بینچ تشکیل دیدیا۔

لاہور ہائیکورٹ کی جانب سے تشکیل دیئے گئے تین رکنی بینچ میں جسٹس عالیہ نیلم اور جسٹس شہباز رضوی شامل ہیں ۔

اس سے قبل رجسٹرار لاہور ہائیکورٹ نے ریفری جج کی تقرری کیلئے فائل چیف جسٹس کو بھجوائی تھی۔

لاہور ہائیکورٹ نے آمدن سے زائد اثاثہ جات کیس میں مسلم لیگ نون کے صدر شہباز شریف کی ضمانت کے کیس میں فائل چیف جسٹس کو بھجوا دی گئی۔

واضح رہے کہ آمدن سے زائد اثاثہ جات کیس میں جسٹس سردار سرفراز ڈوگر نے شہبازشریف کی ضمانت منظور جبکہ جسٹس اسجد جاوید گھرال نے مسترد کردی تھی۔

جسٹس اسجد جاوید گھرال کی جانب سے اختلافی نوٹ سامنے آ نے کے بعد قانونی ماہرین کا کہنا ہے کہ معاملہ چیف جسٹس کو بھیجا جائے گا، اس صورت میں فیصلے کے لیے وہ ریفرل جج مقرر کریں گے۔

دوسری جانب جسٹس اسجد جاوید گھرال نے کہا کہ سماعت کے بعد جب جسٹس سردار سرفراز نے رضامندی طلب کی تو میں نے صاف انکار کیا، جسٹس سرفراز ڈوگر نے اکیلے ہی متفقہ فیصلہ سنا دیا۔

انہوں نے کہا کہ اس بارے میں فوراً ہی چیف جسٹس ہائیکورٹ کو آگاہ کیا، مختصر فیصلہ دستخط کرنے کیلئے بھجوایا گیا جس پر میرے دستخط کرنے کا سوال ہی نہیں اٹھتا۔

بشکریہ جنگ