شہبازگِل تشدد معاملہ، نوم چومسکی کا چیف جسٹس کے نام کھلا خط
امریکی ماہرِ فلسفی، سماجی نقاد، اور سیاسی کارکن پروفیسر نوم چومسکی کی جانب سے چیف جسٹس عمر عطا بندیال کے نام کھلا خط لکھا گیا ہے۔
اوور سیز پاکستانی ووٹرز نامی اکاؤنٹ پر ایک ٹوئٹ شیئر کیا گیا ہے جسے پی ٹی آئی کے رہنما فواد چوہدری نے ری ٹوئٹ کیا ہے۔
ٹوئٹ میں بتایا گیا ہے کہ پروفیسر نوم چومسکی نے چیف جسٹس عمر عطا بندیال کے نام ایک کھلا خط لکھا ہے۔
اس ٹوئٹ کے مطابق پروفیسر نوم چومسکی سمیت 60 سے زائد قومی اور بین الاقوامی سول سوسائٹی کے رہنماؤں، فنکاروں، صحافیوں اور ماہرین تعلیم نے شہباز گِل پر ہونے والے تشدد پر تشویش کا اظہار کیا ہے۔
واضح رہے کہ افواجِ پاکستان کے خلاف بغاوت پر اکسانے کے الزام میں گرفتار پی ٹی آئی رہنما شہباز گِل کو آج پولیس کی جانب سے سفید چادر اوڑھا کر عدالت میں پیش کیا گیا ہے۔
شہباز گِل کو اسلام آباد کے پمز اسپتال سے ڈسچارج کر کے کالے شیشوں والی گاڑی میں اسلام آباد کچہری لایا گیا۔
اسپتال ذرائع کے مطابق ڈسچارج کیے جانے کے موقع پر شہباز گِل نے دوبارہ سینے میں درد ہونے کی شکایت کی تھی۔
دوسری جانب ڈاکٹرز کا کہنا تھا کہ شہباز گِل کی طبیعت بالکل ٹھیک ہے، انہیں سانس کا مسئلہ نہیں ہے۔
Comments are closed.