شوہر کے ساتھ مبینہ تعلقات پر خاتون نے اپنی دوست کو قتل کروادیا

پشاور کے نواحی علاقہ داؤد زئی میں لیڈی پولیو ہیلتھ ورکر کے قتل میں ملوث ملزمان بے نقاب ہوگئے۔ ہیلتھ ورکر کو ساتھی خاتون نے شوہر کے ساتھ مبینہ دوستی کے باعث قتل کروایا۔

ایس ایس پی آپریشن پشاور ہارون رشید نے جیونیوز کو بتایا کہ ہیلتھ ورکر کو ساتھی خاتون نے شوہر کے ساتھ مبینہ دوستی کی وجہ سے قتل کروایا۔

 مقتولہ کی والدہ نے مقتولہ کے سابقہ منگیتر پر دعویٰ دائر کیا تھا، تاہم تفتیش کے دوران سابقہ منگیتر نامزد ملزم سیف اللّٰہ بے گناہ ثابت ہوا۔

ترجمان پولیس کا کہنا ہے کہ لیڈی کانسٹیبل کی لاش کا پوسٹ مارٹم کر والیا گیا، جبکہ معاملے کی تہہ تک پہنچنے کے لئے آئی جی نے انکوائری کمیٹی تشکیل دےدی۔

 ایس ایس پی آپریشن نے کہا کہ ملوث تین ملزمان مسماۃ (ز)، جواد اور سمیع اللّٰہ کو گرفتار کر لیا گیا ہے۔

 ملزمان نے اصل حقائق بتائے، جس کے مطابق خاتون ملزمہ کے شوہر سے مقتولہ کی دوستی تھی جس کا ملزمہ کو رنج تھا۔

 ملزمہ نے خاتون ورکر کو قتل کروانے کا پروگرام بنایا اور پانچ لاکھ روپے کے عوض اجرتی قاتل کی خدمات حاصل کیں۔

 ملزمہ نے مقتولہ کی سابقہ منگنی سے فائدہ اٹھانے کی بھی کوشش کی، لیڈی ہیلتھ ورکر کو قتل کرنے پر الزام سابقہ منگیتر پر لگنا فطری عمل تھا۔

ملزمان واردات کے بعد موٹر سائیکل پر فرار ہوئے۔ پولیس کو جائے وقوعہ سے صرف پستول اور گولیوں کے خالی خول ملے تھے۔

بشکریہ جنگ