شعیب اختر نے کوہلی اور انوشکا کو کونسا خطاب دیا؟

قومی کرکٹ ٹیم کے سابق فاسٹ بولر شعیب اختر نے ویرات کوہلی اور ان کی اہلیہ انوشکا شرما کو خطاب سے نواز دیا۔

ویرات کوہلی کی 3 سال بعد انٹرنیشنل کرکٹ میں سنچری کی تعریف کرتے ہوئے شعیب اختر نے کوہلی کو ’مین آف اسٹیل‘جبکہ ان کی اہلیہ انوشکا شرما کو’آئرن لیڈی‘ کا خطاب دے دیا۔

شعیب اختر نے اپنی یوٹیوب ویڈیو میں کہا کہ مجھے ایشیا کپ میں وہ ویرات کوہلی نظر نہیں آیا لیکن جب انہوں نے افغانستان کے خلاف 50 رنز مکمل کرنے کے بعد جو بیٹنگ کی تب لگا کہ ویرات کوہلی بیٹنگ کر رہا ہے۔

ایشیا کپ 2022 میں افغانستان کے خلاف بیٹنگ کرتے ہوئے ویرات کوہلی نے ٹی ٹوئنٹی انٹرنیشنل میں کیریئر کی پہلی سنچری بنائی۔

سابق فاسٹ بولر نے ویرات کوہلی کی تعریف کرتے ہوئے مزید کہا کہ میں ہمیشہ کہتا تھا کہ کوہلی دنیا کے بہترین بلے بازوں میں سے ایک ہے۔

واضح رہے کہ افغانستان کے خلاف ویرات کوہلی نے ٹی ٹوئنٹی انٹرنیشنل کرکٹ میں پہلی جبکہ مجموعی طور پر بین الاقوامی کرکٹ میں نومبر 2019 کے بعد پہلی سنچری اسکور کی تھی۔

ویرات کوہلی نے 61 گیندوں پر 12 چوکوں اور 6 بلند و بالا چھکوں کی مدد سے 122 رنز کی ناقابلِ شکست اننگز کھیلی تھی ۔ 

بشکریہ جنگ