شاہ عبداللطیف بھٹائی کا 279 واں عرس شروع

سندھ کے عظیم صوفی بزرگ و شاعر شاہ عبداللطیف بھٹائی رحمۃ اللّٰہ علیہ کے 279 ویں عرس کا آغاز ہو گیا۔

قائم مقام گورنر سندھ آغا سراج درانی نے درگاہ پر چادر چڑھا کر عرس کا سرکاری طور پر افتتاح کیا۔

اس موقع پر میڈیا سے گفتگو کرتے ہوئے آغا سراج درانی نے کہا کہ سندھ حکومت نے سیلاب کی وجہ سے عرس سادگی سے منانے کا اعلان کیا ہے۔

انہوں نے کہا کہ زندگی میں اس قدر شدید بارشیں نہیں دیکھیں، ہر طرف تباہی ہے، کسی بھی گورنمنٹ کے بس میں نہیں ہوتا کہ وہ اتنا جلدی کور کرے۔

صوبۂ سندھ میں سیلاب کی تباہ کاریوں کے باعث سندھ حکومت نے عظیم صوفی بزرگ و شاعر شاہ عبداللطیف بھٹائی رحمۃ اللّٰہ علیہ کا عرس منسوخ کرنے کا فیصلہ کر لیا۔

آغا سراج درانی کا کہنا ہے کہ بارش کے بعد ملیریا، ڈینگی اور جلد کی بیماریاں پھیل رہی ہیں، حکومت میڈیکل کی سہولتیں فراہم کرنے کی پوری کوشش کر رہی ہے۔

ان کا یہ بھی کہنا ہے کہ سندھ حکومت کی کوشش ہے کہ وہ سیلاب سے متاثر ہونے والے ہر گاؤں تک پہنچے۔

واضح رہے کہ سندھ کے عظیم بزرگ و صوفی شاعر شاہ عبداللطیف بھٹائی ؒ  کا سالانہ 3 روزہ عرس بھٹ شاہ میں اسلامی سال کے دوسرے مہینے صفر کی 14 تاریخ کو شروع ہوتا ہے۔

بشکریہ جنگ