شاہین شاہ آفریدی فٹبال لے کر اسٹیڈیم میں آگئے

پاکستان اور بنگلادیش کے درمیان جاری ٹیسٹ کے دوران جب میچ خراب موسم کے باعث ممکن نہیں ہوسکا تھا تو شاہین آفریدی فٹبال لے کر میدان میں کود پڑے اور خوب جگلنگ کی۔

پاکستان اور بنگلادیش کے درمیان دوسرے ٹیسٹ میچ کے دوسرے دن کا کھیل خراب موسم کے باعث تاخیر کا شکار رہا۔

ایسے میں پاکستانی بولر شاہین شاہ آفریدی بے چین دکھائی دیئے، وہ چھوٹی گیند سے دور ہوئے تو بڑی بال لیکر میدان میں کود پڑے اور فٹبال کے خوب جوہر دکھائے۔

سری لنکا میں پاکستانی کھلاڑیوں اورکوچز کی سیکیورٹی بڑھانے کا فیصلہ سیالکوٹ واقعے کے بعد کیا گیا۔

پاکستان اور بنگلادیش کے درمیان کھیلے جارہے دوسرے ٹیسٹ میچ میں مسلسل بارش کے باعث دوسرے روز کا کھیل ختم کردیا گیا، تیسرے روز کا کھیل کل آدھے گھنٹے قبل شروع ہوگا۔

میچ میں بارش کے باعث پہلے سیشن کا کھیل نہیں ہوسکا مگر لنچ سے قبل بارش کے رک جانے پر امپائرز نے پچ اور گراؤنڈ کا جائزہ لیا اور اسے کھیلنے کے قابل قرار دیا تھا، تاہم 6 اعشاریہ 2 اوورز کے بعد ہی دوبارہ بارش ہونے کی وجہ سے میچ کو روکا گیا اور مسلسل بارش کے باعث دوسرے روز کا کھیل ختم کردیا گیا۔

گزشتہ روز دوسرے ٹیسٹ میچ کے پہلے دن کا کھیل کم روشنی کے باعث وقت سے قبل ختم کردیا گیا تھا۔

دوسرے دن کے اختتام پر پاکستان نے 2 وکٹوں کے نقصان پر 188 رنز بنالیے ہیں، کپتان بابر اعظم 52 اور اظہر علی 71 رنز بناکر کریز پر موجود ہیں۔

پہلے دن کے اختتام پر پاکستان نے 2 وکٹوں کے نقصان پر 161 رنز بنائے تھے۔

قومی ٹیم کے آؤٹ ہونے والے کھلاڑی اوپنرز عبدﷲ شفیق اور عابد علی تھے، پاکستان کی پہلی وکٹ 59 رنز پر گری تھی جب عبدﷲ 25 رنز بنا کر آؤٹ ہوئے جبکہ دوسرے آؤٹ ہونے والے کھلاڑی عابد علی تھے، وہ 39 رنز بناسکے۔

پاکستان کے دونوں اوپنرز کو بنگلادیش کے تیج الاسلام نے آؤٹ کیا تھا۔

اس سے قبل ٹیسٹ میں پاکستان نے ٹاس جیت کر پہلے بیٹنگ کا فیصلہ کیا تھا اور اپنے وننگ کامبی نیشن کو برقرار رکھتے ہوئے اس میں کوئی تبدیلی نہیں کی تھی۔ 

خیال رہے کہ پہلے ٹیسٹ میچ میں پاکستان نے شاندار کھیل کا مظاہرہ کرتے ہوئے بنگلادیش کو 8 وکٹوں سے شکست دی تھی۔

بشکریہ جنگ