سینیٹ قائمہ کمیٹی کی غزہ پر قرار داد منظور

سینیٹ کی قائمہ کمیٹی برائے مذہبی امور نے غزہ کی صورتِ حال پر قرار داد پیش کی، جسے متفقہ طور پر منظور کرلیا گیا۔

قرار داد میں مظلوم فلسطینیوں پر اسرائیلی حملوں کی شدید مذمت کرتے ہوئے مطالبہ کیا گیا ہے کہ اسرائیل کو عالمی، انسانی مجرم قرار دے کر عالمی عدالتِ انصاف میں مقدمہ چلایا جائے۔

اس موقع پر مولانا عبدالغفور حیدری نے کہا ہے کہ فلسطین انبیاء اور فلسطینیوں کی سر زمین ہے، غاصب اسرائیل کے خلاف جد و جہد پر حماس کی ستائش کرتے ہیں، حماس، اسرائیل جیسی بڑی طاقت کے مقابلے پر سینہ سپر ہے۔

انہوں نے کہا کہ امریکا اور برطانیہ سمیت بہت سے ممالک اسرائیل کو سپورٹ کر رہے ہیں، مسلم ممالک آج بھی فلسطینیوں کی حمایت کے لیے کچھ نہیں کر پا رہے۔

انہوں نے یہ بھی کہا کہ اقوامِ متحدہ ہمیشہ غاصب قوتوں کی پشت پناہی کرتی رہی ہے، جہاں انسانیت کی ذرا سی بھی رمق باقی ہے وہاں اسرائیل کے خلاف احتجاج جاری ہے۔

بشکریہ جنگ