سیمی فائنل میں پاکستان کو شکست: ننھا مداح زار و قطار رونے لگا

قومی کرکٹ ٹیم کے سابق فاسٹ بولر شعیب اختر نے ٹی ٹوئنٹی ورلڈ کپ کے دوسرے سیمی فائنل میں آسٹریلیا کے ہاتھوں پاکستان کی شکست پر زار و قطار رونے والے ننھے مداح کی ویڈیو سوشل میڈیا پر شیئر کردی۔

فوٹو اینڈ ویڈیو شیئرنگ ایپ انسٹاگرام پر شعیب اختر نے ایک ویڈیو شیئر کی ہے جس میں ایک ننھا بچہ پاکستان اور آسٹریلیا کا سیمی فائنل دیکھ رہا ہے۔

ویڈیو میں دیکھا جاسکتا ہے کہ جیسے ہی پاکستان سیمی فائنل میں آسٹریلیا سے ہارتا ہے تو وہ  زار و قطار رونے لگتا ہے جس پر اُس کے والد اُسے چُپ کروانے کی کوشش کرتے ہیں لیکن بچہ چُپ نہیں ہوتا۔

شعیب اختر نے ویڈیو شیئر کرتے ہوئے کیپشن میں لکھا کہ ’جب آپ کی ٹیم اچھا کھیلتی ہے تو ایسا ہوتا ہے، مداحوں کی توقعات بڑھ جاتی ہیں۔‘

سابق کرکٹر نے کہا کہ ’اسی لیے یہ ورلڈ کپ ہمارے لیے بہت اہم تھا۔‘

واضح رہے کہ آئی سی سی مینز ٹی ٹوئنٹی ورلڈ کپ کے دوسرے سیمی فائنل میں آسٹریلیا نے پاکستان کو ایک مرتبہ پھر ناک آؤٹ مرحلے میں شکست دے کر فائنل کے لیے کوالیفائی کرلیا۔

بشکریہ جنگ