سیاسی عدم استحکام نے معاشی ترقی کو مسلسل متاثر کیا: سینیٹر عرفان صدیقی

مسلم لیگ ن کے سینیٹر عرفان صدیقی کا کہنا ہے کہ سیاسی عدم استحکام نے معاشی ترقی کو مسلسل متاثر کیا ہے۔

سینیٹر عرفان صدیقی سے فیصل آباد چیمبر آف کامرس اینڈ انڈسٹری کے وفد نے ملاقات کی۔

سینیٹر عرفان صدیقی نے وفد کی آمد اور منشور کی تیاری کے لیے تجاویز پر شکریہ ادا کیا۔

عرفان صدیقی نے کہا کہ فیصل آباد معاشی سرگرمیوں کا مرکز ہے اور فیصل آباد چیمبر پاکستان کا بڑا چیمبر ہے، سیاسی عدم استحکام نے معاشی ترقی کو مسلسل متاثر کیا ہے، معاشی و قومی ترقی کے سفر میں پیچھے رہنے کے ذمے دار ہم خود ہیں۔

اُنہوں نے کہا کہ نواز شریف کی قیادت میں ’میڈ اِن پاکستان‘ کا فروغ مسلم لیگ ن کی ترجیح ہے، نواز شریف نے دہشت گردی اور  توانائی بحران ختم کیے، ترقی کی شرح 6.1 اور مہنگائی کی شرح 3.8 فیصد پر لائے۔

مسلم لیگ ن کے رہنما نے کہا کہ نوازشریف کی حکومت اور پالیسیاں جاری رہتیں تو ملک آج بدحالی کی اس انتہا کو نہ پہنچتا، منشور میں پاکستان کی معاشی بحالی اور خود انحصاری کے لیے قابلِ عمل تجاویز دیں گے۔

اُنہوں نے کہا کہ معاشی و قومی حالات کی گاڑی غیر معمولی محنت اور تجربہ کار ٹیم ہی ٹھیک کر سکتی ہے، عام انتخابات کے بعد ایک متعین مدت کے اندر انتخابات کروانے کی تجویز منشور میں شامل کرنا زیرِ غور ہے۔

زیرِ غور تجاویز سننے کے بعد وفد نے مطالبہ کیا کہ ناانصافی پر مبنی نیب کا ادارہ ختم کرنے کی تجویز بھی منشور میں شامل کی جائے۔

اس موقع پر ڈاکٹر خرم طارق نے اپنے خیالات کا اظہار کرتے ہوئے کہا کہ پالیسی ریٹ میں بے تحاشہ اضافے نے کاروبار کرنا مشکل بنا دیا ہے۔

وفد نے زراعت، آبی ذخائر، آئی ٹی، برآمدات میں اضافے، ٹیکس سمیت دیگر شعبوں سے متعلق تجاویز دیں۔

وفد نے منشور کی تیاری میں کاروباری برادری اور دیگر شعبوں سے مشاورت کے اقدام کو بھی سراہا۔

بشکریہ جنگ