سکھر، نوجوان کے قتل کا ڈراپ سین، بیوی ملوث نکلی
سکھر میں ٹاؤن شپ کے قریب شاہراہ پر دوران ڈکیتی مزاحمت پر 25 سالہ نوجوان کے قتل کا ڈراپ سین، پولیس نے جدید ٹیکنالوجی کی مدد سے قتل کے مرکزی ملزم کو آلۂ قتل سمیت گرفتار کرلیا۔
ابتدائی تفتیش کے مطابق مقتول کی اپنی بیوی نے آشنا کے ساتھ مل کر ڈکیتی کے دوران شوہر کے قتل کا ڈراما رچایا تھا، مقتول کی ایک سال قبل شادی ہوئی تھی۔
ایس ایس پی سکھر سنگھار ملک کے مطابق سکھر پولیس نے گھوٹکی میں کارروائی کرتے ہوئے مرکزی ملزم شاہ رخ اندھڑ کو گرفتار کرکے آلۂ قتل برآمد کرلیا ہے جبکہ ملزم نے پولیس کے سامنے اعتراف جرم بھی کرلیا ہے۔
گزشتہ رات ٹاؤن شپ کے قریب دوران ڈکیتی مزاحمت پر نوجوان کو قتل کرنے کا کیس رپورٹ ہوا، مقتول کی بیوی نے پولیس کو بتایا تھا کہ گھر جاتے ہوئے شاہراہ پر دوران ڈکیتی ڈاکوؤں نے مجھ سے طلائی زیورات چھینے کی کوشش کی تو شوہر کی مزاحمت پر ڈاکوؤں نے فائرنگ کرکے شوہر کو قتل کردیا۔
گرفتار ملزم کے اعترافی بیان کے بعد پولیس ٹیم لیڈیز پولیس کے ہمراہ مقتول کی بیوی کی گرفتاری کیلئے روانہ ہوگئی۔
Comments are closed.