سپریم کورٹ میں کل سماعت، حکومت کا آئینی و قانونی پہلوؤں پر غور

حکومت نے سپریم کورٹ میں کل کی سماعت سے متعلق آئینی اور قانونی پہلوؤں پر غور کرلیا۔

وزیراعظم شہباز شریف کی زیر صدارت ہونے والا اجلاس ختم ہوگیا، جس میں وفاقی وزیر قانون سینیٹر اعظم نذیر تارڑ نے خصوصی بریفنگ دی۔

اجلاس میں سردار ایاز صادق، عطا تارڑ، احد چیمہ، ملک احمد خان سمیت دیگر حکام نے شرکت کی۔

اس موقع پر سپریم کورٹ میں کل ہونے والی سماعت سے متعلق آئینی اور قانونی پہلوؤں پر غور کیا گیا۔

وزیراعظم کی زیر صدارت ہونے والے اجلاس میں سپریم کور ٹ میں جاری مقدمات اور سیاسی صورتحال پر مشاورت ہوئی۔

اجلاس میں فل بینچ کی استدعا مسترد ہونے پر نظر ثانی کے قانونی پہلوؤں پر بھی مشاورت ہوئی۔

ذرائع کے مطابق وزیراعظم شہباز شریف نے اجلاس میں کہا کہ پنجاب اور خیبر پختونخوا میں اکتوبر سے پہلے الیکشن کروانا مشکل ہے۔

انہوں نے کہا کہ الیکشن ہونے چاہئیں لیکن موجودہ صورتحال میں یہ ممکن نہیں، سپریم کورٹ کا احترام ہے لیکن اختلافی نوٹ سے ابہام پیدا ہوگیا۔

وزیراعظم نے مزید کہا کہ ہم ملکی معیشت ٹھیک کرنے کےلیے دن رات کوشش کر رہے ہیں، مہنگائی کی لہر پر جلد قابو پالیں گے۔

ذرائع کے مطابق شہباز شریف نے کہا کہ ہم تعمیری سیاست پر یقین رکھتے ہیں یہ وقت تخریبی سیاست کا نہیں۔

بشکریہ جنگ