سپریم کورٹ بار کی تحریکِ عدم اعتماد کے دن تصادم روکنے کیلئے درخواست تیار
سپریم کورٹ بار نے تحریکِ عدم اعتماد کے دن سیاسی جماعتوں کے درمیان ممکنہ تصادم کو روکنے کے لیے آئینی درخواست تیار کر لی۔
سپریم کورٹ بار ایسوسی ایشن کے صدرمحمد احسن بھون نے اس حوالے سے بتایا ہے کہ عدم اعتماد سے متعلق درخواست آج سپریم کورٹ میں دائر کی جائے گی۔
سپریم کورٹ میں جو درخواست دائر کی جائے گی اس کے مسودے میں مطالبہ کیا گیا ہے کہ تحریکِ عدم اعتماد کا عمل پُرامن انداز سے مکمل ہو۔
’’ تحریکِ عدم اعتماد وزیرِ اعظم کو ہٹانے کا آئینی راستہ ہے‘‘
مسودے کے مطابق تحریکِ عدم اعتماد آرٹیکل 95 کے تحت کسی بھی وزیرِ اعظم کو ہٹانے کا آئینی راستہ ہے۔
درخواست میں کہا گیا ہے کہ سیاسی بیانات سے تحریکِ عدم اعتماد کے روز فریقین کے درمیان تصادم کا خطرہ ہے۔
مسودۂ درخواست میں یہ بھی کہا گیا ہے کہ سپریم کورٹ تمام اسٹیک ہولڈرز کو تحریکِ عدم اعتماد کا عمل پرامن انداز سے مکمل کرنے کا حکم دے۔
سپریم کورٹ بار ایسوسی ایشن کی درخواست میں وزارتِ داخلہ، وزارتِ دفاع، آئی جی اور ڈپٹی کمشنر اسلام آباد کو فریق بنایا جائے گا۔
Comments are closed.