سندھ: 12سال سے 18سال کے طلبہ اور تدریسی عملے کو ویکسین لازمی لگوانے کی ہدایت

ڈائریکٹر پرائیویٹ انسٹیٹیوشنز ڈاکٹر منسوب حسین صدیقی نے سندھ کے تمام نجی اور سرکاری اسکولوں کو سختی سے ہدایت کی ہے کہ این سی او سی کے فیصلے کے مطابق 12 سے 18 سال کی عمر کے طلبہ اور عملے (تعلیمی اور غیر تدریسی) کی کوویڈ 19 ویسکین لازمی لگوائیں۔

سات جنوری کو ڈائریکٹورٹ پرائیویٹ انسٹیٹیوشنز کے گشتی مراسلے میں کہا گیا ہے کہ حکومت نے یہ قدم اس مہلک وائرس سے طلبہ کی صحت کو بہتر بنانے، تعلیمی عمل کو بلا تعطل جاری رکھنے اور طلبہ کے قیمتی وقت کو بچانے کے لیے اٹھایا ہے۔ 

لہٰذا، تمام پرائیویٹ تعلیمی اداروں کی انتظامیہ کو اس سرکلر کے ذریعے ہدایت کی جاتی ہے کہ وہ اپنے اسکولوں کے طلبہ اور عملے کی 100% ویکسینیشن کو یقینی بنائیں۔ 

اسکولوں کی انتظامیہ کو مزید ہدایت کی گئی ہے کہ وہ اسٹاف ممبران سے ویکسینیشن کارڈز کی کاپی حاصل کریں تاکہ این سی سی او کے فیصلے پر عمل درآمد کو یقینی بنایا جا سکے۔ 

 اگر 12 سال یا اس سے اوپر کی عمر کے کسی بھی طالب علم یا عملے کے ممبر کو انتظامی ٹیم کے معائنہ/دورے کے دوران ویکسین سے محروم پایا گیا تو اسکول انتظامیہ کے خلاف سندھ پرائیویٹ تعلیمی اداروں (ریگولیشن اینڈ ریگولیشن) کے مطابق سخت کارروائی شروع کی جائے گی۔

بشکریہ جنگ