سندھ ہائیکورٹ کا گنے کی قیمت 30 نومبر تک متعین کرنے اور شوگر ملز چلانے کا حکم

سندھ ہائیکورٹ نے صوبے میں 30 نومبر تک گنے کی قیمت کا تعین کرکے شوگر ملز چلانے کا حکم دے دیا۔

کراچی میں عدالت عالیہ سندھ میں گنے کی قیمت کے تعین اور شوگر ملیں چلانے سے متعلق درخواست کی سماعت ہوئی۔

عدالت میں قائم مقام سیکریٹری زراعت، کین کمشنر، درخواست گزار اور وکلاء پیش ہوئے۔

کین کمشنر نے عدالت کو بتایا کہ گنے کی قیمت کے معاملے پر شوگر ملز اور آباد گاروں کے درمیان اجلاس ہوچکا ہے۔

انہوں نے عدالت عالیہ کو مزید بتایا کہ اس حوالے سے دوسرا اجلاس 10 نومبر کو ہوگا ، جس میں گنے کی قیمت طے کی جائے گی۔

کین کمشنر نے سندھ ہائی کورٹ سے 10 نومبر تک کی مہلت طلب کی، عدالت نے 30 نومبر تک گنے کی قیمت کا تعین کرکہ شوگر ملز چلانے کا حکم دے دیا۔

عدالت نےحکم دیا کہ30 نومبر سے قبل قیمت طے کی جائیں اور شوگر ملز چلائی جائیں، عدالت نے درخواست کی سماعت غیر معینہ مدت کے لیے ملتوی کردی۔

بشکریہ جنگ