سندھ کے بیراجوں میں پانی کا بحران بڑھ گیا

صوبۂ سندھ کے بیراجوں میں پانی کا بحران بڑھ گیا، جس کی وجہ سے صوبے میں پانی کی مجموعی کمی 19 فیصد تک پہنچ گئی۔

انچارج کنٹرول روم سکھر بیراج کے مطابق گڈو بیراج پر پانی کی کمی 33 اور سکھر بیراج پر 26 فیصد ہے۔

انہوں نے بتایا کہ محکمۂ آب پاشی سندھ کی درخواست پر چشمہ بیراج سے چھوڑا گیا 12 ہزار اضافی پانی 31 اگست کو گڈو بیراج پہنچے گا۔

انچارج کنٹرول روم سکھر بیراج کا کہنا ہے کہ اضافی پانی آئندہ 84 گھنٹوں میں سکھر بیراج میں داخل ہو گا۔

انہوں نے بتایا کہ گڈو بیراج پر پانی کی آمد 95 ہزار 858 کیوسک اور اخراج 69 ہزار 623 کیوسک ریکارڈ کیا گیا ہے۔

انچارج کنٹرول روم سکھر بیراج کا مزید کہنا ہے کہ سکھر بیراج پر پانی کی آمد 67 ہزار 35 اور اخراج 2600 کیوسک ریکارڈ کیا گیا ہے۔

سکھر بیراج کےکنٹرول روم کے انچارج کا یہ بھی کہنا ہے کہ کوٹری بیراج پر پانی کی آمد 28 ہزار 940 اور اخراج 395 کیوسک ریکارڈ کیا گیا ہے۔

بشکریہ جنگ