سندھ کابینہ کا شہید پولیس اہلکاروں کا معاوضہ پنجاب کے برابر کرنے کا فیصلہ

سندھ کابینہ نے شہید پولیس اہلکاروں کا معاوضہ پنجاب حکومت کے برابر کرنے کا فیصلہ کرلیا۔ 

کابینہ اجلاس کے دوران وزیراعلیٰ کو بریفنگ دیتے ہوئے بتایا گیا کہ اس وقت ایک کروڑ روپے شہید اہلکار کے ورثاء کو دیے جاتے ہیں۔ 

اس موقع پر وزیراعلیٰ سندھ نے کہا کہ معاوضہ 2017 سے شہید ہونے والوں کے ورثاء کو دیا جائے گا۔ 

انہوں نے مزید کہا کہ شہداء کا معاوضہ بڑھانے سے سندھ حکومت پر سالانہ 754 ملین روپے کا اضافی بوجھ پڑے گا۔

سندھ کابینہ نے کچے میں کام کرنے والے پولیس اہلکاروں کو 10 ہزار روپے الاؤنس دینے کی منظوری دے دی۔

سیکریٹری داخلہ اعجاز شاہ نے کہا کہ کچے کے علاقے میں 4500 پولیس اہلکار کام کر رہے ہیں۔ 

انہوں نے یہ بھی کہا کہ کچے میں تعینات اہلکاروں کو الاؤنس دینے سے 540 ملین روپے سالانہ خرچہ آئے گا۔

بشکریہ جنگ