سندھ پر مون سون سسٹم اثر انداز ہے، محکمہ موسمیات

محکمہ موسمیات کا کہنا ہے کہ سندھ پر مون سون سسٹم اثر انداز ہے، کراچی سمیت سندھ کے بیشتر مقامات پر 25 اگست تک بارش متوقع ہے، شہر قائد کے مختلف علاقوں میں صبح سویرے سے وقفے وقفے سے بارش کا سلسلہ جاری ہے۔

کراچی میں نارتھ کراچی، اورنگی ٹاؤن، نارتھ ناظم آباد، ملیر، سعود آباد، ایئرپورٹ، شاہ فیصل کالونی، شارع فیصل ، ایف بی ایریا، واٹر پمپ، شادمان، صدر، آئی آئی چندریگر روڈ پر بوندا باندی کا سلسلہ صبح سویرے سے ہی جاری ہے۔

شاہین کمپلیکس کےقریب سڑک پر درخت گر گیا جس سے آرٹس کونسل چورنگی سے شاہین کمپلیکس چورنگی جانے والی سڑک بند کردی گئی ہے۔

محکمہ موسمیات کا کہنا ہے کہ کراچی کے مختلف علاقوں میں بارش و بوندا باندیکا سلسلہ 2 دن جاری رہے گا اور اس دوران شہر میں کہیں معتدل اور کہیں تیز بارش چلتی ہوتی رہے گی ۔

خیرپور میں نو دن سے جاری بارشوں سے شہر اور نواحی علاقے پانی میں ڈوب گئے ہیں، چار فٹ تک پانی جمع ہونے سے چار سو سے زائد مکانات گرگئے ہیں۔

کراچی میں آئندہ 24 گھنٹوں کےدوران مطلع ابرآلود رہنے اور گرج چمک کے ساتھ بارش متوقع ہے، کہیں کہیں تیز بارش بھی ہوسکتی ہے۔

شہر قائد کا کم سے کم درجۂ حرارت 26.5 ڈگری سینٹی گریڈ ریکارڈ کیا گیا ہے جبکہ زیادہ سے زیادہ درجہ حرارت 31 سے 33 ڈگری سینٹی گریڈ کے درمیان بڑھنے کا امکان ہے۔

محکمہ موسمیات کے مطابق کراچی کی ہوا میں نمی کا تناسب 92 فیصد ریکارڈ کیا گیا ہے جبکہ مغرب سے چلنے والی ہواؤں کی رفتار 14 کلومیٹر فی گھنٹہ ہے۔

دوسری جانب حیدرآباد، میرپورخاص اور نوابشاہ سمیت سندھ کے دیگر علاقوں میں وقفے وقفے سے بارش ہورہی ہے۔

خیرپور، دادو، کنڈیارو، بدین اور مٹیاری سمیت مختلف علاقوں میں سیلاب کی صورتحال ہے، گھر گرنے سے لوگوں کا لاکھوں روپے کا سامان برباد ہوگیا ہے۔

خیرپور میں9 دن سے جاری بارشوں سے شہر اور نواحی علاقے پانی میں ڈوب گئے ہیں، 4 فٹ تک پانی جمع ہونے سے 400 سے زائد مکانات گرگئے ہیں۔

دادو کی تحصیل جوہی، خیرپور ناتھن شاہ اور میہڑ میں بھی بارش نے تباہی مچا رکھی ہے، 60 سے زائد دیہات میں سیلابی صورتِ حال ہے۔

بشکریہ جنگ