سندھ میڈیکل یونیورسٹی: وائس چانسلر کے تقرر کے انٹرویوز 21 مارچ کو لیے جائیں گے

عدالت عالیہ کے حکم کی روشنی میں وزیر اعلیٰ سندھ مراد علی شاہ جناح سندھ میڈیکل یونیورسٹی میں مستقل وائس چانسلر کے تقرر کے سلسلے میں تین ٹاپ امیدواروں کے انٹرویوز پیر 21 مارچ کو لیں گے۔ 

محکمہ بورڈز و جامعات کے ذرائع کے مطابق یہ انٹرویوز ساڑھے 11 بجے ہوں گے یاد رہے کہ تلاش کمیٹی نے سابق پی وی سی جناح سندھ میڈیکل یونیورسٹی ڈاکٹر لبنی بیگ کو 70 نمبر دے کر پہلی، ڈاؤ میڈیکل کالج کے پرنسپل ڈاکٹر امجد سراج میمن کو 67 نمبر دے کر دوسری، اور ڈاکٹر خواجہ مصطفی قادری کو 48 نمبر دے کر تیسرے نمبر پر رکھا تھا۔ 

تاہم وائس چانسلر دوسرے نمبر پر آنے والے ڈاکٹر امجد سراج میمن کو بنایا گیا جس پر اوّل نمبر پر آنی والی ڈاکٹر لبنی بیگ عدالت چلی گئیں پہلے تو عدالت نے ڈاکٹر امجد سراج میمن کی تقرری کا نوٹفیکشن معطل کیا۔ 

بعدازاں 20 فروری کو عدالت نے سندھ ہائی کورٹ نے وائس چانسلر جناح سندھ میڈیکل یونیورسٹی ڈاکٹر سراج امجد میمن کی تقرری کالعدم قرار دیتے ہوئے کہا تھا کہ سندھ حکومت نے سینیارٹی اور قابلیت کا معیار نظر انداز کیا اور اقرباء پروری کے خدشات پر عدالت کو مطمئن نہ کر سکی۔ 

عدالت عالیہ نے اپنے فیصلے میں حکم دیا تھا کہ 30 یوم کے اندر شارٹ لسٹڈ امیدواروں کے دوبارہ انٹرویوز کیے جائیں۔

بشکریہ جنگ