سعودی طیارے کو کولکتہ میں لینڈنگ سے قبل ہنگامی صورتحال کا سامنا

سعودی عرب کے جدہ انٹرنیشنل ایئر پورٹ سے بھارت پہنچنے والے سعودی بوئنگ طیارے کو کولکتہ انٹرنیشنل ایئر پورٹ پر لینڈنگ سے قبل ہنگامی صورت حال کا سامنا کرنا پڑا، فضا میں کئی چکر کاٹنے کے بعد طیارہ باحفاظت لینڈ کر گیا۔ 

ایوی ایشن ذرائع کے مطابق پرواز ایس وی 972 کے طور پر سعودیہ کارگو طیارے نے 15 اپریل کی صبح مقامی وقت کے مطابق 3 بج کر 40 منٹ پر جدہ انٹرنیشنل ایئر پورٹ سے بھارت کے شہر کولکتہ انٹر نیشنل ایئر پورٹ کے لیے ٹیک آف کیا۔

ذرائع کے مطابق لگ بھگ 5061 کلومیٹر کا فاصلہ ساڑھے 5 گھنٹے میں طے کر کے بوئنگ 777 طیارہ کولکتہ انٹرنیشنل ایئر پورٹ پر اترنے والا تھا کہ مقامی وقت کے مطابق دوپہر 11 بج کر 37 منٹ پر طیارے سے ریڈار کو ہنگامی صورت حال کے سگنل موصول ہوئے۔ 

پرواز اس وقت 700 کلومیٹر فی گھنٹہ کی رفتار سے 23550 فٹ کی بلندی پر تھی، ایئر ٹریفک کنٹرولر کی ہدایت پر طیارے کو فضا میں ہولڈ کر لیا گیا۔ 

پائلٹ نے 20 منٹ تک طیارے کو فضا میں چکر لگوائے، بعد ازاں طیارہ ہفتہ کی دوپہر 12 بج کر 2 منٹ پر کولکتہ انٹرنیشنل ایئر پورٹ پر باحفاظت لینڈ کر گیا۔

بشکریہ جنگ