سری لنکن شہری کا قتل ، سینیٹ کی متفقہ مذمتی قرارداد منظور

سانحہ سیالکوٹ میں سری لنکن شہری کے قتل پر سینیٹ کی متفقہ مذمتی قرارداد منظور ہوگئی، قرارداد ڈاکٹر شہزاد وسیم نے پیش کی، بابراعوان نے کہا کہ سانحہ سیالکوٹ میں گرفتارملزمان کیخلاف چالان انسداد دہشت گردی عدالت میں پیش کیا جائے گا۔

سینیٹ اجلاس میں منظور کی گئی قرارداد کے متن میں تحریرہے کہ انتہاپسندی ہرشکل میں قابل مذمت ہے،سانحہ سیالکوٹ انتہاپسند عناصرکے مائنڈ سیٹ کی عکاسی کرتا ہے جومعاشرے میں موجود ہے۔

قرارداد میں کہا گیا کہ اس سانحہ نے ناصرف پاکستان بلکہ اسلام کا پرامن چہرہ تباہ کیا ہے،سری لنکن شہری پریانتھا کمارا کے خاندان سے تعزیت کرتے ہیں،ایوان نے معاشرے میں ایسے رویوں کی موجودگی پر اظہار تشویش کیا۔

سینیٹ کی قرارداد میں کہا گیا کہ حکومت انتظامی،قانونی اورآگاہی اقدمامات کرے تاکہ معاشرے سے ایسے پرتشدد رجحانات کا خاتمہ ہو، جبکہ یہ مطالبہ بھی کیا گیا کہ سری لنکن شہری پریانتھا کمارا کے مجرموں کو سخت سزادی جائے۔

سینیٹ اجلاس میں چیئرمین سینیٹ نے کہاکہ وفد پریانتھا کمارا کے خاندان سے ملاقات کرے گا اور ان کے اہلخانہ کو سینیٹ سے منظور قرارداد پیش کرے گا۔

بابراعوان نے کہا کہ سیالکوٹ واقعے نے پاکستان کے بیرون ملک چہرے پر سوالات اٹھائے،ملزمان کو گرفتار کر لیا گیا ہے،چالان انسداد دہشت گردی عدالت میں پیش کیا جائے گا،عدالت قانون کے مطابق انہیں سزا دے گی۔

انہوں نے بتایا کہ امید ہے پولیس 7 روز میں چالان عدالت میں پیش کرے گی،فوجداری قوانین کے نقائص کو دور کرنے کے لیے کردار ادا کرنا ہوگا، سانحہ اے پی ایس کے کچھ مقدمات اب تک عدالت میں زیرسماعت ہیں، موٹر وے، زینب اور نور مقدم کیسز کے فیصلے جلد نہیں ہو رہے۔

بشکریہ جنگ