ساہیوال سے بازیاب چاروں لڑکیوں سے زیادتی نہیں ہوئی: میڈیکل رپورٹ

لاہور کی مقامی عدالت میں ساہیوال سے ملنے والی چاروں بچیوں کی میڈیکل رپورٹ پیش کی گئی ہے جس میں کہا گیا ہے کہ لڑکیوں کے ساتھ زیادتی نہیں ہوئی۔

ساہیوال سے ملنے والی چاروں لڑکیوں کے بیان ریکارڈ کرنے کے لیے لاہور کے مجسٹریٹ کی عدالت میں سماعت ہوئی۔

لاہور کے علاقے ہنجر وال کی 4 لڑکیوں کے اغواء میں ملوث ملزمان سے کی گئی پولیس کی تفتیش میں مختلف انکشافات سامنے آ رہے ہیں، جن کے مطابق ملزم قاسم نے بتایا ہے کہ اس نے 4 لڑکیوں میں سے 1 لڑکی کا دوسرے ملزم شہزاد کے ساتھ 1 لاکھ روپے میں سودا کیا تھا۔

چاروں بچیوں اور ان کے اغواء میں ملوث ملزمان کو لاہور کی مقامی عدالت میں پیش کیا گیا۔

مجسٹریٹ نے کہا کہ لڑکیوں کے بیان کے لیے سماعت بند کمرے میں ہو گی۔

عدالت نے حاضری لگوانے کے بعد ملزمان کو کمرۂ عدالت سے باہر بھیج دیا، جس کے بعد لڑکیوں کا بیان ریکارڈ کیا گیا۔

لاہور سے اغواء ہونےوالی چاروں لڑکیوں نے بھی پولیس کی تفتیش میں چونکا دینے والے انکشافات کیئے ہیں، لڑکیوں نے بتایا کہ ایک ملزم نے انہیں نشہ آور مشروب بھی پلایا اور ساہیوال میں غلط کام کرنے والی لڑکی سےملاقات بھی کرائی۔

چاروں لڑکیوں کی میڈیکل رپورٹ بھی عدالت میں پیش کی گئی جس میں بتایا گیا ہے کہ چاروں لڑکیوں سے زیادتی نہیں ہوئی۔

واضح رہے کہ عدالت نے چاروں بچیوں کا میڈیکل کرانے کا حکم دیا گیا تھا۔

بشکریہ جنگ