10 سالہ سارہ شریف کی ہلاکت کے سلسلے میں ہونے والی تحقیقات میں پولیس کو پوچھ گچھ کے لیے مطلوب تین افراد پاکستان سے برطانیہ جانے کے لیے روانہ ہو گئے ہیں۔

پاکستان سے برطانیہ جانے والے ان تین افراد میں سارہ کے والد عرفان شریف، ان کی سوتیلی والدہ بینش بتول اور سارہ کے چچا فیصل ملک شامل ہیں۔

سرے پولیس کے مطابق یہ تینوں افراد سارہ کی ہلاکت سے قبل ووکنگ میں رہائش پزیر تھے تاہم پولیس کو سارہ کی میت ملنے سے ایک روز قبل یہ پاکستان آ گئے تھے۔

یہ تینوں افراد بدھ کے روز برطانیہ پہنچیں گے۔ سارہ کی لاش 10 اگست کو ووکنگ میں اُن کے گھر سے ملی تھی اور ان کی پوسٹ مارٹم رپورٹ میں ان کے جسم پر ’متعدد زخموں کے نشانات‘ پائے گئے تھے۔

سارہ کے والد عرفان، اُن کی اہلیہ بینش اور اُن کے بھائی فیصل نے بدھ کی رات لندن ایئرپورٹ پر اُترنے والی پرواز میں سیٹوں کی بکنگ کروائی جو بدھ کی صبح سیالکوٹ ایئرپورٹ سے دبئی روانہ ہوئی۔

تاہم ابھی تک اس بات کی تصدیق نہیں ہو سکی کہ وہ دبئی پہنچنے کے بعد برطانیہ جانے والی پرواز میں سوار ہوئے یا نہیں۔

دوسری جانب ان تین افراد کے ہمراہ پاکستان پہنچنے والے سارہ شریف کے پانچ بہن بھائیوں کو عارضی طور پر حکومت کے زیر انتظام بچوں کی دیکھ بھال کے ادارے میں بھیج دیا گیا ہے۔

پیر کے روز پاکستانی حکام نے سارہ کے بہن بھائیوں کو اُن کے دادا محمد شریف کے گھر سے تحویل میں لیا تھا۔

منگل کی صبح عرفان شریف کے اہلخانہ ان بچوں کو اپنے ساتھ عدالت میں لے کر آئے تھے اور اس دوران اُنھیں پولیس اہلکاروں اور مقامی میڈیا کے نمائندوں نے گھیرے رکھا اور یہ سلسلہ قریب 40 منٹ تک جاری رہا تھا۔

اس دوران انھیں ایک عدالت سے دوسری عدالت میں منتقل کیا جاتا رہا کیونکہ حکام یہ جاننے کی کوشش کر رہے تھے کہ ان بچوں کے ساتھ کیا ہونا چاہیے۔ تاہم بعد ازاں عدالت نے انھیں بچوں کی دیکھ بھال کے سینٹر منتقل کرنے کے احکامات جاری کیے تھے۔

پاکستان پہنچنے کے بعد سے سارہ کے والد، سوتیلی والدہ اور چچا روپوش ہو گئے تھے اور حکام بہت عرصے سے ان کی تلاش میں سرکرداں تھے۔

اسی دوران پانچ ستمبر کو سارہ شریف کے والد اور ان کی سوتیلی والدہ نے اپنے ایک ویڈیو بیان میں کہا تھا کہ وہ برطانیہ میں حکام کے ساتھ تحقیقات میں تعاون کرنے کے لیے تیار ہیں۔

سارہ شریف کی موت کے بعد ان کی سوتیلی والدہ بینش اور ان کے والد عرفان کا یہ پہلا عوامی رابطہ تھا۔

اس فوٹیج میں سارہ کے والد عرفان خاموش دکھائی دے رہے تھے جبکہ ان کی سوتیلی والدہ بینش بتول کو ایک نوٹ بُک سے پڑھ کر بیان دیتے دیکھا جا سکتا تھا۔

سارہ کی سوتیلی والدہ نے اپنے اس ویڈیو پیغام میں سارہ کی موت کو ایک حادثہ قرار دیا تھا اور اس حوالے سے دو جملوں میں انتہائی مختصر بات کی تھی۔

سارہ کی سوتیلی والدہ نے دو منٹ 36 سیکنڈ کی اس ویڈیو میں پاکستانی پولیس پر ہراساں کرنے کے الزامات عائد کیے اور کہا کہ پولیس ان کے خاندان کے دیگر افراد کو خوفزدہ کر رہی ہے اور انھیں غیر قانونی طور پر حراست میں لے رہی ہے جبکہ ان کے گھروں پر چھاپے مارے جا رہے ہیں۔

بینش بتول نے اپنے پیغام میں کہا تھا کہ ’ہمارے روپوش ہونے کی وجہ یہ ہے کہ ہمیں ڈر ہے کہ پاکستانی پولیس تشدد کر کے ہمیں مار ڈالے گی۔‘

جہلم پولیس کے سربراہ محمود باجوہ نے بی بی سی سے بات چیت میں ان الزامات کی تردید کرتے ہوئے کہا تھا کہ خاندان کے افراد کو ہراساں کرنے اور تشدد کرنے کے تمام الزامات غلط ہیں۔