سابق ایم پی اے ممتاز علی چانگ کیخلاف بجلی چوری کا مقدمہ درج

صادق آباد میں  پیپلز پارٹی کے سابق ایم پی اے ممتاز علی چانگ کے خلاف بجلی کی چوری کا مقدمہ درج کر لیا گیا۔

پولیس کے مطابق ممتاز چانگ کے گھر گزشتہ روز ملتان الیکٹرک پاور کمپنی (میپکو) کی ٹیم نے چھاپہ مارا تھا۔

میپکو کے ترجمان کے مطابق سابق ایم پی اے نے 15 ایکڑ رقبے پر فارم ہاؤس میں ڈائریکٹ تاریں لگا رکھی تھیں، فارم ہاؤس میں 12 سے زائد اے سی چلائے جا رہے تھے، بجلی چوری کر کے قومی خزانے کو بھاری نقصان پہنچایا جا رہا تھا۔

جنوبی پنجاب کے 13 اضلاع میں 319 بجلی چوروں پر مقدمات درج کیے گئے۔

اس حوالے سے ممتاز علی چانگ کا کہنا تھا کہ گھر میں نہ رہنے کے باوجود گزشتہ ماہ 97 ہزار کا بل آیا، مخالفین پیسے دے کر ان کے خلاف کارروائی کروا رہے ہیں۔

انہوں نے کہا تھا کہ میپکو کے خلاف آواز اٹھانے پر کارروائی کی ہے، رورل ایریا میں بجلی زیادہ نہیں ہوتی، میپکو کی کرپشن زیادہ ہے، ان پر متعدد کیسز ہیں۔

ممتاز علی چانگ کا یہ بھی کہنا تھا کہ میرے پاس 5 بڑے ہیوی جنریٹر موجود ہیں، لاکھوں کا پیٹرول استعمال ہوتا ہے، چوری کرنی ہوتی تو بڑی کرتے۔

بشکریہ جنگ