زمیر راجہ بھی کرکٹر آصف علی کی تعریف کیے بغیر نہ رہ سکے

پاکستان کرکٹ بورڈ (پی سی بی) کے چیئرمین رمیز راجہ بھی پاک افغان میچ کے ’پلیئر آف دی میچ‘ آصف علی کی تعریف کیے بغیر نہ رہ سکے، سوشل میڈیا پر پیغام جاری کردیا۔

رمیز راجہ نے اپنے تصدیق شدہ ٹوئٹر اکاؤنٹ پر جاری کیے گئے پیغام میں کہا کہ ’آصف علی نے ایک سنسنی خیز مقابلے میں اور شدید دباؤ کے باوجود بھی قابلِ تعریف کھیل کا مظاہر کیا۔‘

اُنہوں نے قومی ٹیم کو جیت کی مبارکباد دیتے ہوئے کہا کہ ’اسی طرح محنت کرتے رہو۔‘

چیئرمین پی سی بی رمیز راجہ نے اپنے ٹوئٹ میں ’پاکستان زندہ باد‘ کا نعرہ بھی لگایا۔

ٹی ٹوئنٹی ورلڈکپ میں افغانستان کے خلاف میچ میں ناقابلِ شکست اننگز کھیلنے والے آصف علی نے کہا ہے کہ میری کامیابی صرف اللّہ کی طرف سے ہے۔

خیال رہے کہ گزشتہ رات افغانستان سے میچ میں آصف علی نے 19ویں اوور میں چار چھکے لگا کر پاکستان کو فاتح بنا دیا ۔

افغانستان کے خلاف جارحانہ اننگز کی بدولت پلیئر آف دی میچ کا ایوارڈ حاصل کرنے والے آصف علی کا کہنا ہے کہ خود پر اعتماد تھا کہ ٹارگٹ پورا کر لیں گے ، شعیب ملک سے ایک اوور پہلے کہا تھا کہ آخری اوور میں 25رنز بھی ہوئے تو بنا لیں گے۔

قومی کرکٹ ٹیم کے سابق کپتان شاہد آفریدی نے افغانستان کے خلاف پاکستان کی شاندار فتح کو فنٹاسٹک قرار دے دیا۔

دوسری جانب ورلڈ کپ ٹی 20 کے گروپ 2 میں پاکستان نے افغانستان کو 5 وکٹوں سے شکست دے کر سیمی فائنلسٹ کی فہرست میں اپنی جگہ مضبوط کرلی ہے۔

بشکریہ جنگ