ریکوڈک منصوبے کی ڈیل پر دستخط کی منظوری

وفاقی کابینہ نے ریکوڈک منصوبے کی حتمی ڈیل پر دستخط کرنے کی باضابطہ منظوری دے دی۔

اسلام آباد میں وزیراعظم شہباز شریف کی زیر صدارت وفاقی کابینہ کا اجلاس ہوا۔

ریکوڈک معاہدے پر وفاقی حکومت کی 2 اتحادی جماعتوں کے وزراء نے کابینہ اجلاس کا بائیکاٹ کردیا۔

وزیراعظم نے اجلاس سے خطاب میں کہا کہ حکومت ریکوڈک منصوبے سمیت دیگر منصوبوں میں سرمایہ کاروں کے حقوق کے تحفظ کو یقینی بنائے گی۔

انہوں نے مزید کہا کہ سرمایہ کاروں سے کیے گئے تمام وعدے پورے کیے جائیں گے۔

اجلاس میں دی گئی بریفنگ میں بتایا گیا کہ ریکوڈک پروجیکٹ کی تنظیم نو کے حتمی معاہدوں پر قانونی رائے کے لیے صدارتی ریفرنس دائر کیا گیا۔

بریفنگ میں مزید کہا گیا کہ حتمی معاہدوں پر قانونی رائے کے لیے صدارتی ریفرنس آئین کے آرٹیکل 186 کے تحت دائر کیا گیا۔

وفاقی وزیر خزانہ اسحاق ڈار نے کہا ہے کہ وقت سے پہلے انتخابات ناممکن لگتے ہیں،صدر عارف علوی سے معیشت پر بات چیت ہوئی ہے۔

بریفنگ میں یہ بھی کہا گیا کہ سپریم کورٹ نے 9 دسمبر کو رائے دی کہ ریکوڈک پراجیکٹ کی تنظیم نو کا عمل شفاف تھا، جن معاہدوں پر دستخط کیے جارہے ہیں وہ قانون کے عین مطابق ہیں۔

کابینہ اجلاس کے اعلامیے کے مطابق وفاقی کابینہ نے ای سی سی سے منظور کئے گئے ریکوڈک پروجیکٹ فنڈنگ پلان کی توثیق کردی۔

اعلامیے کے مطابق وفاقی کابینہ نے ریکوڈک منصوبے کی حتمی ڈیل پر دستخط کرنے کی باضابطہ منظوری دے دی، 15 دسمبر کو ڈیل پر حتمی دستخط ہوجائیں گے۔

اعلامیے کے مطابق کابینہ نے وزارت پٹرولیم اور دیگر وزارتوں کے حکام کو باضابطہ اجازت دے دی۔

بشکریہ جنگ