ریاست دہشتگردوں اور ان کے سہولت کاروں سے پوری طاقت کے ساتھ نمٹے گی، کور کمانڈرز کانفرنس
آرمی چیف کی زیر صدارت کور کمانڈرز کانفرنس نے اعادہ کیا کہ ریاست دہشتگردوں، سہولت کاروں اور ان کی حوصلہ افزائی کرنے والوں سے مکمل طاقت سے نمٹے گی۔
پاک فوج کے شعبہ تعلقات عامہ آئی ایس پی آر کے مطابق پاک فوج نے ہر قسم کے خطرات کے خلاف پاکستان کی خود مختاری، علاقائی سالمیت کے دفاع کیلئے کا عزم کا اعادہ کیا۔
آرمی چیف جنرل عاصم منیر نے آپریشنز کے دوران پیشہ وارانہ مہارت کا معیار برقرار رکھنے پر زور دیا۔ انہوں نے فارمیشنز کی تربیت کے دوران بہترین کارکردگی کے حصول پر بھی زور دیا۔
کور کمانڈرز کانفرنس کے شرکا نے کہا کہ ریاستِ پاکستان اور مسلح افواج شہداء اور ان کے اہلخانہ کو ہمیشہ احترام کی نگاہ سے دیکھتی ہیں۔
سپہ سالار نے فوجیوں کی فلاح و بہبود، حوصلے بلند رکھنے اور مسلسل توجہ پر کمانڈرز کی تعریف کی۔
فورم کا کہنا تھا کہ خصوصی سرمایہ کاری سہولت کونسل کی زیر نگرانی معاشی سرگرمیوں کی مکمل حمایت کی جائے گی، معیشت کو نقصان پہنچانے والی سرگرمیوں کے خاتمے کیلئے حکومت کی مکمل معاونت کی جائے گی۔
کور کمانڈرز نے کہا کہ ریاستی اداروں اور عوام کے درمیان خلیج پیدا کرنے والوں کو مایوسی کے سوا کچھ حاصل نہیں ہوگا، مذموم پراپیگنڈہ کرنے والے ایسے عناصر مزید رسوائی کا شکار ہوں گے۔
کانفرنس میں ضم شدہ اضلاع، بلوچستان کے سرحدی اضلاع میں امن و ترقی پر بھی زور دیا گیا۔
کانفرنس کے شرکاء کو قومی سلامتی کو درپیش چیلنجز اور بڑھتےخطرات کے جواب میں حکمت عملی کے بارے میں بریفنگ دی گئی، شرکاء نے بلواسطہ اور بلاواسطہ خطرات کے خلاف پاکستان کی خودمختاری کے دفاع کے عزم کا اعادہ کیا۔
کانفرنس کے شرکاء نے مسلح افواج، قانون نافذ کرنے والے اداروں، سول سوسائٹی کے شہداء کو خراج عقیدت پیش کیا، شہداء کے ایصال ثواب کیلئے فاتحہ خوانی بھی کی گئی۔
Comments are closed.