چیچنیا کے رہنما رمضان قادروف نے 25 فروری کو اعلان کیا کہ ان کے وفادار چیچن جنگجو یوکرین میں روسی فوج کے شانہ بشانہ لڑ رہے ہیں۔

ایک تقریر میں قادروف نے کہا کہ روسی صدر ولادیمیر پوتن نے درست فیصلہ کیا ہے اور ہم ان کا ساتھ دیں گے، چاہے حالات کچھ بھی ہوں۔

یوکرین میں تعینات چیچن جنگجوؤں کی تعداد کتنی ہے، اس پر حتمی طور پر کچھ نہیں کہا جا سکتا۔ لیکن چند میڈیا اطلاعات میں 10 ہزار جنگجوؤں کا ذکر کیا گیا ہے اور کئی ہلاک بھی ہو چکے ہیں۔

قادروف نے دو چیچن جنگجووں کے ہلاک ہونے کا اعتراف کیا ہے لیکن کچھ اطلاعات کے مطابق یہ تعداد کہیں زیادہ ہے۔

یوکرین کی حکومت نے حال ہی میں دعویٰ کیا تھا کہ چیچن جنگجوؤں کی ایک ایسی خصوصی یونٹ کا خاتمہ کر دیا گیا جو یوکرین کے صدر ولادیمیر زیلنسکی کو قتل کرنے کے مقصد سے دارالحکومت کیئو پہنچی تھی۔

روس یوکرین تنازع:اس جنگ کے آپ کی زندگی پر کیا اثرات ہو سکتے ہیں؟ ہمیں اپنے سوال بھیجیں

یوکرین میں لڑائی شروع ہونے سے ایک روز قبل روسی حکومت کے قریب سمجھے جانے والے چینل ’رشیا ٹوڈے‘ نے چیچنیا کے دارالحکومت گروزنی کے ایک چوک میں جمع ہونے والے چیچن جنگجوؤں کے ہجوم کی ویڈیو کلپس نشر کیں اور کہا کہ یہ جنگجو صدر پوتن کی جانب سے یوکرین جانے کے احکامات کا انتظار کر رہے ہیں۔

پھر 27 فروری کو ایک آڈیو پیغام میں قادروف نے روسی قیادت سے جنگ کی حکمت عملی تبدیل کرنے اور یوکرین کی لڑائیوں میں زیادہ طاقت استعمال کرنے کا مطالبہ کیا۔

انھوں نے کہا کہ ’یوکرین کے قوم پرست صرف طاقت کی زبان سمجھتے ہیں۔ اب وقت آ گیا ہے کہ دشمن کو خوش کرنا بند کر دیا جائے اور یوکرین میں ہر طرف سے بڑے پیمانے پر فوجی آپریشن شروع کیا جائے۔ ہمیں اپنی حکمت عملی تبدیل کرنی چاہیے۔‘

رمضان قادروف آخر کون ہیں اور وہ صدر پوتن کے قریبی ساتھی کیسے بنے؟

قادروف روس میں ایک طاقت ور شخصیت بن چکے جن کا روسی فیڈریشن میں کافی اثر و رسوخ ہے۔ وہ ایک دہائی سے زیادہ عرصے سے شمالی قفقازی جمہوریہ اور چیچنیا میں استحکام برقرار رکھنے کے لیے کریملن کے مضبوط ہاتھ کے طور پر جانے جاتے ہیں، حتیٰ کہ یہ بھی کہا جاتا ہے کہ چیچن جمہوریہ قادروف کی نجی جاگیر بن چکی ہے جسے چیلنج کرنے والا کوئی نہیں۔

انسانی حقوق کی عالمی تنظیموں نے قادروف پر طاقت کے بے جا اور غیر قانونی استعمال کے الزامات عائد کیے ہیں جن میں اختلاف کرنے والوں کی جبری گمشدگی، تشدد اور ہم جنس پرستوں پر ظلم و ستم شامل ہیں۔

قادروف پر یہ الزام بھی لگا کہ انھوں نے اپنے کئی مخالفین کو قتل کروایا جن میں سے کچھ یورپ میں تھے لیکن وہ اپنے اوپر عائد ان الزامات سے انکار کرتے رہے ہیں۔

سنہ 2015 میں، قادروف نے ایک چیچن سیکیورٹی گارڈ کی تعریف کی جس پر روسی مخالف بورس نیمتسوو کو قتل کرنے کا الزام ہے۔ واضح رہے کہ بورس کو روسی صدر پوتن کے بڑے مخالفین میں سے سمجھا جاتا تھا۔

قادروف نے کہا تھا کہ کہ روس کی وزارت داخلہ کے افسر زاؤر دادائیف روس کے وفادار ہیں اور مادر وطن کے لیے اپنی جان قربان کرنے کے لیے تیار ہیں۔ دادایف کی اس تعریف کے ایک ہی دن بعد، قادروف کو پوتن نے ایک اعلیٰ تمغے سے نوازا تھا۔

روس کا یوکرین پر حملہ: ہماری کوریج

بی بی سی لائیو پیج

روس نے یوکرین پر حملہ کیوں کیا اور صدر پوتن آخر چاہتے کیا ہیں؟

نیٹو کیا ہے اور روس کو اس پر اعتبار کیوں نہیں

ولادیمیر پوتن : سرکاری کوارٹرز میں رہنے والے سابق جاسوس صدر کیسے بنے؟

ولادیمیر زیلنسکی کا اداکاری سے یوکرین کی صدارت تک کا سفر

’کیئو کا ارب پتی شہزادہ‘: پاکستانی لڑکا جو یوکرین کا ’سٹیل کنگ‘ بنا

کریملن سے وفاداری

رمضان قادروف چیچنیا کے سابق صدر احمد قادروف کے بیٹے ہیں۔ سنہ 2003 کے انتخابات میں صدر منتخب ہونے والے احمد قادروف چند ماہ بعد ایک بم دھماکے میں ہلاک ہو گئے۔

نوّے کی دہائی کے اوائل میں جب چیچنیا میں روس کے خلاف بغاوت کا آغاز ہوا تو رمضان قادروف اور ان کے والد پہلی چیچن جنگ کے دوران روسی افواج کے خلاف لڑنے والے عسکریت پسندوں میں شامل تھے۔ لیکن 1999 میں دوسری چیچن جنگ کے آغاز پر انھوں نے ماسکو کی حمایت کا فیصلہ کیا۔

انسانی حقوق کی تنظیموں نے ’کادیروفسی‘ کہلانے والی قادروف کی طاقتور نجی ملیشیا پر جنگ زدہ چیچنیا میں 1990 کی دہائی میں تشدد، اغوا اور قتل کا الزام بھی لگایا۔

بی بی سی کے مراد بطال الشیشانی کا کہنا ہے کہ چیچنیا کے روس مخالف عسکری اسلام پسندوں کے ساتھ قادروف کی جنگ بھی کریملن کی اس منصوبہ بندی کا حصہ ہے جس کا مقصد شمالی قفقاز کو پرامن اور روس کے زیر انتظام لانا ہے۔

سنہ 2007 میں پوتن نے قادروف کو چیچنیا کا صدر تعینات کیا تھا۔ وہ اس سے پہلے ہی صدر پوتن کے وفادار ساتھی کے طور پر مشہور ہو چکے تھے۔

قادروف نے مشرقی یوکرین میں پوتن کے حامی باغیوں اور روس کی جانب سے کریمیا کے الحاق کی بھرپور حمایت کی۔ ان کو ماضی میں پابندیوں کا بھی سامنا کرنا پڑا۔

سنہ 2020 میں قادروف کا 15 لاکھ فالوورز کا حامل انسٹاگرام اکاؤنٹ امریکی پابندیوں کی وجہ سے بند کر دیا گیا تھا۔

فیس بک نے ان کا اکاؤنٹ 2017 میں بند کر دیا تھا۔

قادروف اور پوتن میں کچھ اور قدریں بھی مشترک ہیں۔ ہتھیاروں کے ساتھ تصاویر سے لے کر مارشل آرٹس مقابلوں میں حصہ لینا قادروف کی بھی خصوصیت ہے۔

مخالفین کی توہین

چیچنیا کی حکومت پر تنقید کرنے والوں کو بعض اوقات مقامی سرکاری ٹی وی پر توہین آمیز طریقے سے دکھایا جاتا ہے۔

مثال کے طور پر جب کچھ ڈاکٹروں نے کورونا وائرس کے پھیلاؤ کے ساتھ حفاظتی آلات کی کمی کی شکایت کی تو یہ ڈاکٹر چیچن ٹیلی ویژن پر نمودار ہوئے جہاں انھوں نے اپنے غلط ہونے کا اعتراف کیا۔

یہ بھی پڑھیے

چیچنیا: حکمران خاندان کی شان میں نظمیں لکھنے پر بچوں کے لیے نقد انعامات

’کیئو کا ارب پتی شہزادہ‘: پاکستانی لڑکا جو یوکرین کا ’سٹیل کنگ‘ بنا

جوہری ہتھیاروں کا بٹن کس کے پاس ہوتا ہے اور یہ حملہ کیسے کیا جاتا ہے؟

رمضان قادروف کی بلی واپس کرو ورنہ۔۔۔

سنہ 2018 میں روس میں بی بی سی کے سٹیو روزنبرگ نے جب قادروف سے ملاقات میں ان کے خلاف انسانی حقوق کی خلاف ورزیوں کے الزامات کا تذکرہ کیا تو قادروف نے کہا کہ ’کتا بھونکتا ہے لیکن کارواں چلتا رہتا ہے۔ میرے بارے میں یہ باتیں لکھنے والے انسان نہیں ہیں۔‘

روزن برگ کو آج بھی سنہ 2005 میں قادروف سے ہونے والی اپنی پہلی ملاقات یاد ہے۔ انھوں نے بتایا کہ ملاقات میں جیسے ہی قادروف نے گٹار بجایا تو روزن برگ نے ان سے کہا کہ ’میں بھی ایک ساز بجاتا ہوں، میں پیانو بجاتا ہوں۔‘

قادروف نے طنزیہ انداز میں جواب دیا کہ ’پھر میں اپنا پیانو بجاتا ہوں، اور اگر تم برا بجاتے ہو تو میں تمھیں جیل میں ڈال دوں گا۔‘

صوفی سلسلے کی سرپرستی

قادروف نے اپنے والد کے نقش قدم پر چلتے ہوئے چیچنیا میں مرکزی صوفی سلسلے سلسلہ قادریہ کی سرپرستی کی۔

بی بی سی کے الشیشانی کہتے ہیں کہ: ’چیچنیا میں قادریہ سلسلے کے پیروکار ہمیشہ روس کے مخالف رہے، لیکن تاریخ میں پہلی بار قادروف چیچنیا کے اسلام پسندوں کے خلاف کریملن کے اتحادی بن گئے۔‘

قادروف نے روس کے بیوروکریٹک ریاستی اداروں کو نظرانداز کرتے ہوئے کریملن یعنی پوتن کے ساتھ براہ راست تعلق قائم کیا، جو دونوں کے لیے مفید انتظام تھا۔

یہ غالباً ان ہی تعلقات کا نتیجہ تھا جب روس نے چیچنیا میں تعمیر نو کے لیے خطیر رقم کا اعلان کیا جس کے تحت ایک نیا سڑکوں کا نظام اور دارالحکومت گروزنی میں ایک بڑی مسجد کا منصوبہ بھی شامل تھا۔

مخالفین کے قتل کے الزامات

برطانیہ کی برمنگھم یونیورسٹی میں شمالی قفقازی امور کے ماہر سرون مور کا کہنا ہے کہ قادروف اور روسی فیڈرل سیکیورٹی سروس (ایف ایس بی) کے تعلقات کم از کم سنہ 2000 سے ہیں جب پوتن روس کے صدر بنے تھے۔

قادروف کے خلاف لکھنے والی ایک ممتاز تفتیشی صحافی اینا پولٹکوسکایا کو سنہ 2006 میں ماسکو میں اُن کے اپارٹمنٹ کے باہر گولی مار کر ہلاک کر دیا گیا تھا۔

اس مقدمے میں دو افراد کو عمر قید کی سزا سنائی گئی تھی لیکن یہ معلوم نہیں ہو سکا تھا کہ ان کو قتل کرنے کا حکم کس نے دیا تھا۔

سنہ 2009 میں روسی انسانی حقوق کی علمبردار نتالیہ ایسٹیمیرووا کو شمالی قفقاز میں گولی مار کر ہلاک کر دیا گیا تھا۔ وہ قادروف کے طریقوں کی مخالفت کرنے والی ایک نمایاں آواز تھیں۔

قادروف کے کچھ پرانے ساتھی جو بعد میں ان کے خلاف ہو گئے تھے، بیرون ملک قتل ہوئے۔ ان میں ویانا میں ان کے سابق ذاتی محافظ عمر اسرائیلوف اور دبئی میں سلیم یامادایف کی ہلاکت شامل ہیں۔