رضوان کی سنچری، سلطانز کا کنگز کو 197 رنز کا ہدف

ایچ بی ایل پی ایس ایل 8 کے 11ویں میچ میں ملتان سلطانز نے کپتان محمد رضوان کی دھواں دار بیٹنگ کی بدولت کراچی کنگز کو جیت کے لیے 197 رنز کا ہدف دے دیا۔

ملتان کرکٹ اسٹیڈیم میں کھیلے جا رہے میچ میں کراچی کنگز نے ٹاس جیت کر ملتان سلطانز کو پہلے بیٹنگ کی دعوت دی۔ 

سلطانز کی اوپننگ جوڑی محمد رضوان اور شان مسعود نے 85 رنز کی شاندار شراکت بنا کر ٹیم کے لیے بڑے اسکور کی بنیاد رکھی۔ 

شان مسعود نے 51 رنز کی اننگز کھیلی جنہیں تجربہ کار آل راؤنڈر شعیب ملک نے آؤٹ کیا۔ 

محمد رضوان نے اپنی شاندار فارم برقرار رکھتے ہوئے کراچی کنگز کے خلاف سنچری داغ دی۔ انہوں نے رائیلی روسوو کے ہمراہ سنچری پارٹنرشپ بنا کر ٹیم کو 2 وکٹوں کے نقصان پر 196 تک پہنچا دیا۔ 

محمد رضوان نے 10 چوکوں اور 4 چھکوں کی بدولت 110 رنز کی ناقابلِ شکست اننگز کھیلی۔

کراچی کنگز کی ٹیم اپنے صف اول کے بولر محمد عامر کے بغیر میدان میں اتری۔

کراچی کنگز کی قیادت عماد وسیم کر رہے ہیں جبکہ دیگر کھلاڑیوں میں جیمز وِنس، حیدر علی، شعیب ملک، میتھیو ویڈ، عرفان خان نیازی، بین کٹنگ، عامر یامین، محمد عمر، عمران طاہر اور عاکف جاوید شامل ہیں۔ 

دوسری جانب ہوم ٹیم ملتان سلطانز محمد رضوان کی کپتانی میں میدان میں اتری، دیگر کھلاڑیوں میں شان مسعود، رائیلی روسوو، ڈیوڈ ملر، کیرون پولارڈ، خوشدل شاہ، کالوس بریتھویٹ، اسامہ میر، عباس آفریدی، محمد الیاس اور احسان اللّٰہ شامل ہیں۔

بشکریہ جنگ