رانا ثناء کا چیف جسٹس کی ساس کی مبینہ آڈیو پر ازخود نوٹس کا مطالبہ

وفاقی وزير داخلہ رانا ثناءاللّٰہ نے چیف جسٹس کی ساس کی مبینہ آڈیو پر ازخود نوٹس لے کر اس کا فارنزک آڈٹ کروانے کا مطالبہ کردیا۔

فیصل آباد میں پریس کانفرنس کرتے ہوئے وفاقی وزیر داخلہ نے کہا کہ چیف جسٹس کی ساس کی آڈیو پر سوموٹو لیاجائے، اگر گفتگو درست ہے تو ان سے پوچھ گچھ کرنا چاہیے۔

چیف جسٹس پاکستان عمر عطاء بندیال کی ساس ماہ جبین نون کی مبینہ آڈیو سامنے آ گئی، آڈیو لیک میں ماہ جبین نون اور وکیل خواجہ طارق رحیم کی اہلیہ گفتگو کر رہی ہیں۔

انہوں نے یہ بھی کہا کہ جن کے متعلق گفتگو ہے ان کو استعفیٰ دینا چاہیے۔

وزیر داخلہ کا کہنا تھا کہ چوہدری پرویز الہٰی کی آڈیو پر بھی اب تک ازخود نوٹس نہیں لیا گیا۔

انہوں نے کہا کہ ضد اور انا پر فیصلے ہو رہے ہیں، انصاف کے ایوانوں میں بیٹھے لوگ بچوں، عزیزوں، ساس سسر کے کہنے پر فیصلے کرتے ہیں۔

بشکریہ جنگ