رابطہ کمیٹی اجلاس، پارٹی رہنما بہادر آباد پہنچنا شروع

کراچی میں ایم کیو ایم رابطہ کمیٹی کا اجلاس دوپہر 2 بجے عارضی مرکز بہادر آباد پر طلب کیا گیا جس کیلئے پارٹی رہنما بہادرآباد پہنچنا شروع ہوگئے ہیں۔

ایم کیو ایم رابطہ کمیٹی اجلاس کی صدارت کنوینر ڈاکٹر خالد مقبول صدیقی بذریعہ ویڈیو لنک کریں گے۔

رابطہ کمیٹی اجلاس کیلئے نسرین جلیل، محفوظ یار خان کے علاوہ کہف الوری،حمید الظفر،شکیل احمد، ارشد حسن، ارشاد ظفیر اور ڈاکٹرعبدالقادر خانزادہ بھی بہادر آباد مرکز پہنچ چکے ہیں۔

ترجمان ایم کیو ایم کے مطابق اجلاس میں ایم کیو ایم پاکستان کی رابطہ کمیٹی کے تمام اراکین شرکت کریں گے، جبکہ اسلام آباد میں موجود عامر خان، وسیم اختر، کنور نوید اور امین الحق کے علاوہ فیصل سبزواری ، خواجہ اظہار الحسن اور جاوید حنیف ویڈیو لنک سے شرکت کریں گے۔

ترجمان نے بتایا کہ رابطہ کمیٹی کے دیگر اراکین بہادرآباد مرکز سے اجلاس میں شرکت کریں گے۔

ذرائع کے مطابق ایم کیو ایم نے 20 سے زائد نکات پر مبنی مطالبات حکومت اور اپوزیشن کےسامنے رکھے ہیں، رابطہ کمیٹی نے مذاکرات کا مینڈیٹ مذاکراتی کمیٹی کو دیا تھا، مذاکراتی کمیٹی طے پانے والے معاہدے کی تفصیلات سے رابطہ کمیٹی کو آگاہ کرے گی۔

ذرائع کاکہنا ہے کہ رابطہ کمیٹی مذاکراتی کمیٹی کے کئے جانے والے معاہدے کی توثیق کرے گی۔

بشکریہ جنگ