ذکاء اشرف کی ممکنہ برطرفی، حکومت کو تحریری جواب جمع کرانے کی ہدایت
لاہور ہائی کورٹ نے پاکستان کرکٹ بورڈ (پی سی بی) چیئرمین مینجمنٹ کمیٹی ذکاء اشرف کی ممکنہ برطرفی کے معاملے پر وفاقی حکومت کو تحریری جواب جمع کرانے کی ہدایت کر دی۔
لاہور ہائی کورٹ کے جسٹس چوہدری محمد اقبال نے کیس کی سماعت کی۔
عدالت نے درخواست مزید سماعت کے لیے جسٹس شاہد کریم کے پاس بھجوانے کی سفارش کر دی۔
لاہور ہائی کورٹ نے درخواست سیکریٹری الیکشن کمیشن کے پاس بھجوانے کی استدعا مسترد کر دی۔
عدالتی حکم پر ایڈیشنل اٹارنی جنرل عدالت میں پیش ہو کر بتایا کہ ابھی معاملہ صرف کابینہ ڈویژن کے پاس گیا ہے، درخواست گزار نے سمری چیلنج کر رکھی ہے۔
ذکاء اشرف کے وکیل نے کہا کہ ورلڈ کپ سے قبل سیکریٹری پی سی بی اپنی مینجمنٹ کمیٹی کا چیئرمین لانا چاہتا ہے، سیکریٹری پی سی بی نے وزیرِ اعظم کے پرنسپل سیکریٹری کو ذکاء اشرف کو ہٹانے کے لیے خط لکھ دیا۔
وکیل نے کہا کہ سیکریٹری الیکشن کمیشن نے ملک میں عام انتخابات کے تناظر میں اداروں کو خط لکھا، پی سی بی کا ملک میں ہونے والےعام انتخابات سے کوئی تعلق نہیں، چیئرمین بورڈ آف مینجمنٹ پی سی بی کی تعیناتی وفاقی حکومت نے کی، نگراں حکومت منتخب حکومت کے فیصلوں کو ختم کرنے کا اختیار نہیں رکھتی۔
ذکاء اشرف کے وکیل نے استدعا کی کہ عدالت سیکریٹری پی سی بی کی جانب سے ذکاء اشرف کو ہٹانے کے لیے لکھے گئے خط کو کالعدم قرار دے۔
Comments are closed.