دوسرے ون ڈے سے قبل ایرون فنچ سمیت چند کھلاڑیوں کی پریکٹس

پاکستان اور آسٹریلیا کے درمیان دوسرے ون ڈے میچ کل کھیلا جائے گا، آسٹریلیا ٹیم کے کپتان ایرون فنچ سمیت چند کھلاڑیوں نے پریکٹس سیشن میں حصہ لیا۔

آسٹریلیا کی کرکٹ ٹیم کے کپتان ایرون فنچ سمیت چند کھلاڑیوں نے قذافی اسٹیڈیم میں 2 گھنٹے تک ٹریننگ کی۔

مہمان ٹیم کے کھلاڑیوں نے 3 مختلف نیٹس پر بیٹنگ اور بولنگ کی بھرپور پریکٹس کی، آسٹریلوی ٹیم کے میڈیا منیجر کےمطابق ٹریننگ سیشن آپشنل تھا، جس کی وجہ سے صرف کچھ کھلاڑیوں نے حصہ لیا۔

دوسری جانب آسٹریلیا کی کرکٹ ٹیم کے تمام اراکین کی کورونا وائرس ٹیسٹ رپورٹ منفی آئی ہے، مچل مارش انجری کے باعث ون ڈے سیریز سے باہر ہوگئے ہیں، کورونا مثبت آنے والے دو کھلاڑی آئیسولیشن میں ہیں۔

بیک اپ کے طور پر طلب کیے جانے والے آسٹریلوی کھلاڑی میتھو رنشا پاکستان پہنچ گئے ہیں اور اب 3 روزہ آئیسولیشن میں ہیں۔

دوسری طرف پاکستان کرکٹ ٹیم کے کھلاڑیوں نے آرام کیا، دونوں ٹیموں کے درمیان سیریز کا دوسرا ایک روزہ میچ کل کھیلا جائے گا۔

بشکریہ جنگ