دلہا دلہن نے اسکائی ڈائیونگ کرتے ہوئے شادی کرلی

خلا میں شادی کے تصور میں نہ جانے کب حقیقت کے رنگ بھرے جائیں گے تاہم منفرد شادی کے خواہاں منچلوں نے مہمانوں سمیت فضا میں ایک دوسرے کا ہاتھ تھام کر زندگی بھر ساتھ نبھانے کا وعدہ کرلیا۔

اگر آپ رواتی انداز کی شادیوں سے بور ہوگئے ہیں اور اپنی شادی کے موقع پر کچھ دنیا سے ہٹ کر کرنا چاہتے ہیں تو آپ جیسے منچلوں کے لئے ایک منفرد پیشکش کی جا رہی ہے جس میں آپ واقعی دنیا سے باہر شادی کرسکتے ہیں۔

فوٹو اینڈ ویڈیو شیئرنگ پلیٹ فارم انسٹاگرام پر ایک ویڈیو خوب وائرل ہو رہی ہے جس میں ایک جوڑے نے شادی کے دن کو یادگار بنانے کے لئے منفرد اقدام کیا۔

وائرل ویڈیو میں دیکھا جاسکتا ہے کہ دلہا اور دلہن نے شادی کے مہمانوں سمیت ایک اونچی چٹان پر چڑھنے کے بعد وہاں سے چھلانگ لگادی۔

دلہا اور دلہن نے فضا میں ہی شادی کی رسومات ادا کیں اور زندگی بھر ایک دوسرے کا ساتھ نبھانے کا وعدہ کیا۔

سوشل میڈیا پر وائرل اس ویڈیو کو 39 ہزار سے زائد بار دیکھا اور پسند کیا جاچکا ہے جبکہ اس کے کمنٹس میں صارفین دلچسپ تبصرے کر رہے ہیں۔

ایک صارف نے اس منفرد انداز کو بے حد پسند کرتے ہوئے لکھا کہ اپنی شادی بھی اسی انداز میں منعقد کرنے کا خواہاں ہوں تاہم اونچائی سے خوف آتا ہے جبکہ کچھ صارفین کے مطابق ’یہ کچھ زیادہ ہوگیا‘۔

بشکریہ جنگ