دعا زہرا کیس، نکاح خواں اور گواہ 5دن کے ریمانڈ پر پولیس کے حوالے

مبینہ طور پر پسند کی شادی کرنے والی لڑکی دعا زہرا کے گرفتار نکاح خواں نے عدالت میں نکاح پڑھانے کی تردید کر دی۔

کراچی جوڈیشل مجسٹریٹ شرقی میں  دعا زہرا کے مبینہ اغواء سے متعلق مقدمے کی سماعت ہوئی،  پولیس نے گرفتار نکاح خواں اور گواہ کو عدالت میں پیش کر دیا۔

دوران سماعت گرفتار نکاح خواں غلام مصطفیٰ نے عدالت میں بیان دیتے ہوئے کہا کہ میں نے نکاح نہیں پڑھایا، میرا نام استعمال کیا گیا ہے۔

جس پر تفتیشی افسر کا عدالت سے ریمانڈ کی استدعا کرتے ہوئے کہنا تھا کہ تفتیش کرنی ہے کہ واقعی ملزم نے نکاح پڑھایا بھی ہے یا نہیں۔

عدالت کی جانب سے دونوں ملزمان، نکاح خواں اور گواہ کو 5 دن کے ریمانڈ پر پولیس کی تحویل میں دیتے ہوئے آئندہ سماعت پر تفتیشی افسر سے پیش رفت رپورٹ پیش کرنے کا حکم دیا گیا ہے۔

بشکریہ جنگ