دبئی: سمندر پر مسجد کی تعمیر، نماز کی ادائیگی کیلئے زیر سمندر ہال

دبئی میں اگلے سال سمندر پر تعمیر شدہ مسجد کا افتتاح کیا جائے گا، اس مسجد میں نماز کی ادائیگی کیلئے زیر سمندر ہال ہوگا۔

یہ مسجد دبئی واٹر کینال میں ‘محکمہ اسلامی امور اور فلاح’ تعمیر کر رہا ہے۔

حکام کا کہنا ہے کہ مسجد میں تین منزلیں ہوں گی جہاں 50 سے 75 افراد کے نماز پڑھنے کی گنجائش ہوگی۔

حکام نے آج مسجد کی نظر کو بھانے والی کئی تصاویر شیئر کیں جس سے اندازہ ہوتا ہے کہ یہ مسجد کس قدر خوبصورت ہوگی۔

دبئی میں ایک دلکش نئی تعمیر شدہ مسجد نمازیوں کے لیے کھول دی گئی ہے۔

حکام نے کہا کہ سمندر پر تعمیر شدہ مسجد امارات میں سیاحوں کیلئے بہت کشش کا باعث ہوگی، سیاحوں کو نماز پڑھنے یا صرف مسجد دیکھنے کیلئے بھی جانے کی اجازت ہوگی۔

سمندر کے اوپر تعمیر ہونے والی دو منزلوں میں اسلامی لیکچر اور ورکشاپس کیلئے ہال ہوگا۔ یہ مسجد زمین سے بھی جڑی ہوگی، تعمیراتی کام آخری مراحل میں ہے، اسے سیاحوں کیلئے اگلے برس کھول دیا جائے گا۔

تمام عقائد کے افراد کو مسجد آنے کی اجازت ہوگی بشرطیکہ وہ مناسب لباس پہنیں اور اسلامی روایات کے مطابق برتاؤ رکھنا ہوگا۔

مسجد میں داخلے کیلئے خواتین کو اپنے سر اور کندھے ڈھانپنا ہوں گے۔

بشکریہ جنگ