خلائی کچرا گھر پر گرنے کے بعد امریکی خاندان کا ناسا سے ہرجانے کا مطالبہ

خاندان کے وکیل میکا گوین وردھی کا کہنا ہے کہ حالیہ برسوں میں خلائی ٹریفک میں اضافے کے باعث خلائی کچرا ایک سنگین مسئلہ بن گیا ہے۔انھوں نے ایک بیان میں کہا ہے کہ ’میرے موکل اس واقعے کی وجہ سے اپنی زندگیوں میں آنے والی پریشانی اور اثرات کے لیے مناسب معاوضہ چاہتے ہیں۔‘

خلائی کچرے کا مسئلہ

انسان کے تیار کردہ خلائی راکٹوں کے ملبے کے کم از کم 130 ملین ٹکڑے زمین کے گرد مدار میں موجود ہیں، جن میں سے زیادہ تر سات کلو میٹر فی سیکنڈ سے زیادہ کی رفتار سے گھوم رہے ہیں۔ عام زبان میں ان کی رفتار کسی بندوق سے نکلی گولی سے آٹھ گنا زیادہ تیز ہے۔اگرچہ ملبے کی یہ تعداد اپنے آپ میں حیران کن ہے لیکن کچھ سائنس دانوں کا خیال ہے کہ یہ ایک محتاط تخمینہ ہے اور ملبہ کی تعداد اس سے کہیں زیادہ ہو سکتی ہے۔خلا میں بھیجی جانے والی زیادہ تر اشیا اس وقت تک وہیں رہتی ہیں جب تک کہ وہ یا تو مدار سے باہر نہ ہو جائیں یا پھر دوبارہ زمین کی فضا میں داخل ہوتے ہوئے جل نہ جائيں یا زمین سے دور کھنچ کر چلی جائیں اور مدار میں سینکڑوں سال تک چکر لگاتی رہیں۔اس طرح کی زیادہ تر اشیا دراصل بہت چھوٹی ہیں یعنی ایک سینٹی میٹر سے بھی کم۔ ان میں راکٹوں پر لگے پینٹ کے پرخچوں سے لے کر الیکٹرانکس کے چھوٹے ٹکڑے اور ’انسولیشن فوم‘ یا ایلومینیم کے ٹکڑے تک شامل ہیں۔خلا میں موجود کچرے کے اتنے چھوٹے چھوٹے ٹکروں سے بنے ملبے کو زمین سے نہیں دیکھا جا سکتا، یہاں تک کہ طاقتور دوربینوں سے بھی نہیں دیکھا جا سکتا۔ لہٰذا ہمیں چاہیے کہ خلا میں موجود اس کچرے کو دیگر اشیاء سے ٹکراتے وقت کے شواہد تلاش کریں مگر یہ کوئی آسان کام نہیں ہے۔ناسا کے پانچ خصوصی مشنز کے بار بار مدار میں جانے اور پھر زمین پر واپس آنے کے بعد اس مسئلے کے دائرہ کار کا جائزہ لینے کا کام سنجیدگی سے شروع کیا گیا۔ ناسا نے سنہ 1981 کے بعد سے اب تک کل 135 شٹل مشن لانچ کیے ہیں۔

ہر خلائی شٹل کے زمین پر واپس آنے کے بعد اس کا باریک بینی کے ساتھ جائزہ لیا گیا تاکہ خلا میں موجود ملبے سے ہونے والے کسی نقصان کی نشاندہی کی جا سکے اور اس سے ناسا کو خلا میں اڑنے والے مردہ مصنوعی سیاروں کے چھوٹے ٹکڑوں کے مسئلے کی واضح تصویر حاصل ہو سکے۔ناسا کے سائنسدانوں کو توقع کے مطابق ملبے کے چھوٹے چھوٹے ٹکڑے ملے جو کہ صرف چند ملی میٹر تک چھوٹے لیکن طاقتور اثرات پیدا کر سکتے ہیں۔ ناسا نے اس بات کا بھی اندازہ لگایا کہ ملبے سے خلا کتنی خراب ہو رہی ہے۔اس سے قبل سنہ 1978 میں ناسا کے سائنسدانوں ڈان کیسلر اور برٹن کور پلائس نے ’کیسلر سنڈروم‘ کے نام سے ایک نظریے کی تجویز پیش کی تھی۔ انھوں نے اس نظریے کے تحت جس رجحان کو پیش کیا وہ واقعات کا ایک تباہ کن اور لامتناہی سلسلہ ہے۔ جب کوئی سیٹلائٹ خلائی کوڑے کے ٹکڑے سے ٹکراتا ہے تو اس سے مزید ملبہ پیدا ہوتا ہے کیونکہ وہ مصنوعی سیاروں کو تباہ کر دیتا ہے اور اس طرح یہ کبھی نہ ختم ہونے والا سلسلہ بن جاتا ہے۔واضح طور پر یہ ایک بہت بڑا مسئلہ ہے۔ تو ہم ملبے کے پیدا ہونے کی رفتار کو کس طرح کم کر سکتے ہیں یا اسے مکمل طور پر ختم کر سکتے ہیں؟ اس کے تجویز کردہ حل میں بتایا گیا ہے کہ خلائی جہاز کے لانچ کے پانچ سال کے اندر ہی اسے مدار میں ریڈی ایشن ہارڈ کا استعمال کرتے ہوئے مدار سے نکال لیا جائے۔اس کے لیے راکٹ یا سیٹلائٹ ایسے مواد سے تیار کیے جائیں جو اعلیٰ سطح کی تابکاری اور خلاء میں پیش آنے والے انتہائی درجہ حرارت سے ہونے والے نقصان کے لیے کم حساس ہو اور دوبارہ قابل استعمال راکٹوں کے ساتھ لانچ کیا جائے۔اس وقت سائنسدانوں کو لکڑی کے مصنوعی سیاروں کا خیال آیا۔ اور اس کے لیے ناسا اور جاپانی ادارے جیکسا کا ’ل‍ِگنوسیٹ‘ نامی پروجیکٹ تیار کیا گیا جس میں کافی کے پیالے کے سائز کا بکسہ تیار کیا گی۔ تقریبا 10 ضرب 10 ضرب 10 سینٹی میٹر کے اس ڈبے کو جاپانی تکنیک سے جوڑا گیا ہے تاکہ اس میں خلائی مشن کے لیے الیکٹرانکس اور دوسرے مواد رکھے جا سکیں۔ یہ کچھ مکعب شکل کے سیٹلائٹس کی طرح ہوں گے۔

کیا لکڑی کے سیٹلائٹ مستقبل ہیں؟

،تصویر کا ذریعہKYOTO UNIVERSITYسنہ 2022 میں بین الاقوامی خلائی سٹیشن کے لیے لکڑی سے تیار کردہ جاپانی تجرباتی ماڈیول کیبو کی لکڑی کے نمونوں کا تجربہ کیا گیا۔جب اس لکڑی کے بنے صندوق یا بکسے پر شدید کائناتی شعاعوں کی بمباری کی گئی اور اسے خلا کے سخت ماحول میں درجہ حرارت کی انتہائی تبدیلیوں کا سامنا کرایا گیا تو مگنولیا درخت کی لکڑی نے بہتر کارکردگی کا مظاہرہ کیا۔ان تجربات سے گزرنے کے بعد نہ تو یہ جلی، نہ سڑی، نہ اس میں دراڑیں آئیں اور نہ ہی اس کی شکل تبدیل ہوئی اور جب یہ زمین کی فضا میں واپس داخل ہوئی تو جل کر ختم ہو گئی اور صرف باقیات کے طور پر تھوڑی سے راکھ بچی۔لکڑی کے مصنوعی سیاروں کا ایک اور فائدہ ان کے منعکس کرنے کی صلاحیت کی کمی ہے۔ فی الحال ایلومینیم کے مصنوعی سیاروں سے جو انعکاس ہوتا ہے وہ انتہائی روشن ہو سکتے ہیں اور وہ زمین سے کھلی آنکھ سے آسانی سے دیکھے جا سکتے ہیں۔ اہم بات یہ ہے کہ یہ منعکس ہونے والی روشنی حساس علاقوں تک پہنچ سکتی ہے اور فلکیاتی مشاہدات میں مداخلت کر سکتی ہے۔لِگنو سیٹ نامی سیٹلائٹ کا آزمائشی آغاز فی الحال 2024 کے لیے ہے اور اگر یہ کامیاب رہتا ہے تو مستقبل کے مشن کے لیے یہ راستہ ہموار کر دے گی۔تو کیا مستقبل قریب میں تمام سیٹلائٹ لکڑی سے بنائے جائیں گے؟ بدقسمتی سے یہ ممکن نہیں ہے لیکن اس کا مثبت پہلو یہ ہے کہ اس طرح کے منصوبے محققین کو لگے بندھے اصولوں سے ہٹ کر سوچنے کی ترغیب دیتے ہیں اور اس کی وجہ سے مزید اثرات مرتب ہو سکتے ہیں۔اگر لگنو سیٹ کامیاب ہو جاتا ہے تو آئندہ خلا میں مزید ملبے کو روکنے کی کوشش میں بایوڈیگریڈیبل مواد کو شامل کرنے کی کوشش ہو سکتی ہے۔تاہم ابھی کے لیے میں زمین کے گرد مدار میں زیادہ سے زیادہ اشیاء کو فعال طور پر تلاش یا ٹریک کیے جانے والے کام کی ایک مضبوط حامی ہوں تاکہ خلا میں موجود مواد کے ساتھ مستقبل کے تصادم کو کم سے کم کیا جا سکے۔
BBCUrdu.com بشکریہ

body a {display:none;}